ఆంధ్రప్రదేశ్ మాజీ ఉప ముఖ్యమంత్రి, మాజీ మంత్రి, టీడీపీ నేత ఆళ్ల నాని (కాళీ కృష్ణ శ్రీనివాస్) అకాల మరణంపై ముఖ్యమంత్రి నారా చంద్రబాబు నాయుడు తీవ్ర దిగ్భ్రాంతి వ్యక్తం చేశారు. గుండెపోటుతో ఆళ్ల నాని కన్నుమూయడం తనను తీవ్రంగా కలచివేసిందని చంద్రబాబు ఆవేదన వ్యక్తం చేశారు. ఈ కష్ట సమయంలో ఆయన కుటుంబ సభ్యులకు ప్రగాఢ సానుభూతి తెలిపారు.
ఆళ్ల నాని మృతి పట్ల చంద్రబాబు నాయుడు సోషల్ మీడియా వేదికగా స్పందించారు. ఆళ్ల నాని మరణం పట్ల విచారం వ్యక్తం చేస్తూ.. ఆయన ఆత్మకు శాంతి చేకూరాలని భగవంతుడిని ప్రార్థిస్తున్నట్లు పేర్కొన్నారు. నాని కుటుంబ సభ్యులకు ఈ విషాద సమయంలో మనోధైర్యం కలగాలని ఆకాంక్షించారు.ఆళ్ల నాని విశాఖపట్నంలో ఉన్న సమయంలో గుండెపోటుకు గురైనట్లు సమాచారం. కుటుంబ సభ్యులు వెంటనే ఆసుపత్రికి తరలించినప్పటికీ అప్పటికే పరిస్థితి విషమంగా ఉండటంతో ఆయన మృతి చెందినట్లు వార్తలు వెలువడ్డాయి. ఈ ఆకస్మిక మరణంతో ఆంధ్రప్రదేశ్ రాజకీయ వర్గాల్లో విషాదం నెలకొంది.ఏలూరు రాజకీయాల్లో ఆళ్ల నాని కీలక నేతగా గుర్తింపు పొందారు. కాంగ్రెస్ పార్టీ ద్వారా రాజకీయ ప్రస్థానం ప్రారంభించిన ఆయన అనంతరం వైఎస్సార్ కాంగ్రెస్ పార్టీలో చేరారు. ఎమ్మెల్యేగా, ఎమ్మెల్సీగా, మంత్రిగా, ఉప ముఖ్యమంత్రిగా వివిధ బాధ్యతలు నిర్వహించారు. 2019లో వైసీపీ ప్రభుత్వం ఏర్పడిన సమయంలో వైద్య ఆరోగ్యశాఖ మంత్రిగా, డిప్యూటీ సీఎంగా బాధ్యతలు చేపట్టారు.
2024 అసెంబ్లీ ఎన్నికల్లో ఏలూరు నుంచి వైసీపీ అభ్యర్థిగా పోటీ చేసిన ఆళ్ల నాని ఓటమి పాలయ్యారు. అనంతరం వైసీపీకి రాజీనామా చేసి 2025లో తెలుగుదేశం పార్టీలో చేరారు. అప్పటి నుంచి టీడీపీతో కొనసాగుతున్నారు.సౌమ్య స్వభావం, వివాదాలకు దూరంగా ఉండే నాయకుడిగా ఆళ్ల నానికి రాజకీయ వర్గాల్లో గుర్తింపు ఉందని ఆయన అనుచరులు పేర్కొంటున్నారు. ఆయన మృతితో ఏలూరు, పశ్చిమగోదావరి జిల్లాల రాజకీయ వర్గాల్లో విషాద ఛాయలు అలుముకున్నాయి.
ఆళ్ల నాని మరణవార్త తెలిసిన వెంటనే పలువురు రాజకీయ నాయకులు సంతాపం వ్యక్తం చేస్తున్నారు. ఆయనతో ఉన్న అనుబంధాన్ని గుర్తు చేసుకుంటూ కుటుంబ సభ్యులకు సానుభూతి తెలియజేస్తున్నారు. ముఖ్యమంత్రి చంద్రబాబు నాయుడు కూడా నాని కుటుంబానికి తన ప్రగాఢ సానుభూతిని వ్యక్తం చేస్తూ.. ఆయన ఆత్మకు శాంతి చేకూరాలని ప్రార్థించారు.ఆళ్ల నాని ఆకస్మిక మరణం టీడీపీతో పాటు రాష్ట్ర రాజకీయాల్లోనూ తీవ్ర విషాదాన్ని మిగిల్చింది. ఆయన కుటుంబ సభ్యులు, అభిమానులు, అనుచరులు తీవ్ర దిగ్భ్రాంతిలో ఉన్నారు.
