తెలంగాణ రాజకీయాల్లో మరోసారి కేబినెట్ విస్తరణ అంశం హాట్టాపిక్గా మారింది. రాష్ట్ర అసెంబ్లీ సమావేశాలు ముగింపు దశకు చేరుకోవడంతో.. ఆ తర్వాత మంత్రివర్గ విస్తరణపై స్పష్టత వచ్చే అవకాశం ఉందన్న చర్చ కాంగ్రెస్ వర్గాల్లో జోరుగా సాగుతోంది. ఇప్పటికే మంత్రి పదవుల కోసం ఆశావహులుగా ఉన్న పలువురు నేతలు తమ ప్రయత్నాలను ముమ్మరం చేసినట్టు రాజకీయ వర్గాల్లో ప్రచారం జరుగుతోంది. కొందరు నేతలు ఢిల్లీకి వెళ్లి పార్టీ పెద్దలను కలుస్తున్నారన్న చర్చ కూడా వినిపిస్తోంది.ప్రస్తుతం తెలంగాణ కేబినెట్లో మూడు మంత్రి పదవులు ఖాళీగా ఉన్నట్లు రాజకీయ వర్గాల్లో చర్చ ఉంది. ఈ ఖాళీలను ముఖ్యమంత్రి రేవంత్ రెడ్డి ఎప్పుడు భర్తీ చేస్తారనే అంశంపై కాంగ్రెస్ నేతల్లో ఆసక్తి నెలకొంది. గతంలో కొండా సురేఖను మంత్రివర్గం నుంచి తొలగించిన తర్వాతే కేబినెట్ విస్తరణ ఉంటుందని పలువురు భావించారు. అయితే అప్పట్లో విస్తరణ జరగకపోవడంతో ఆశావహుల నిరీక్షణ కొనసాగుతోంది.
ఇప్పుడు అసెంబ్లీ సమావేశాలు ముగింపునకు చేరుకోవడంతో కేబినెట్ విస్తరణపై మరోసారి ఊహాగానాలు ఊపందుకున్నాయి. అసెంబ్లీ సమావేశాలు పూర్తయిన తర్వాత ముఖ్యమంత్రి రేవంత్ రెడ్డి మంత్రివర్గ కూర్పుపై దృష్టి పెట్టే అవకాశం ఉందని కాంగ్రెస్ వర్గాల్లో చర్చ జరుగుతోంది. ముఖ్యంగా సామాజిక సమీకరణాలు, ప్రాంతీయ ప్రాతినిధ్యం, పార్టీకి సంబంధించిన రాజకీయ సమీకరణాలను పరిగణనలోకి తీసుకుని కొత్త మంత్రుల ఎంపికపై కసరత్తు జరిగే అవకాశం ఉందని తెలుస్తోంది.మరోవైపు అసెంబ్లీ సమావేశాల చివరి రోజుల్లో 22A భూముల అంశంపై ప్రభుత్వం విస్తృతంగా వివరణ ఇవ్వనున్నట్లు ప్రచారం జరుగుతోంది. రాష్ట్రవ్యాప్తంగా చర్చనీయాంశంగా మారిన ఈ అంశంపై రెవెన్యూ శాఖ మంత్రి పొంగులేటి శ్రీనివాస్ రెడ్డి సభలో వివరాలు వెల్లడించనున్నట్లు తెలుస్తోంది. భూములపై ఉన్న అనుమానాలు, ప్రభుత్వ విధానం, రికార్డులు, నిషేధిత భూముల అంశాలకు సంబంధించి ప్రభుత్వం తన వైఖరిని స్పష్టం చేయనున్నట్లు రాజకీయ వర్గాల్లో చర్చ సాగుతోంది.
ముఖ్యమంత్రి రేవంత్ రెడ్డి కూడా ఈ అంశంపై సుదీర్ఘంగా వివరణ ఇచ్చే అవకాశం ఉందన్న ప్రచారం ఉంది. ప్రధాన ప్రతిపక్షం బీఆర్ఎస్ సభలో లేకపోయినా.. గతంలో ప్రతిపక్షం లేవనెత్తిన అంశాలకు సమాధానం ఇవ్వడంతో పాటు ప్రభుత్వం తన వాదనను బలంగా వినిపించాలని భావిస్తున్నట్లు తెలుస్తోంది.అయితే అసెంబ్లీ సమావేశాలు పూర్తయ్యే వరకు ముఖ్యమంత్రి ప్రధానంగా సభపైనే దృష్టి పెట్టే అవకాశం ఉంది. సమావేశాలు ముగిసిన తర్వాతే కేబినెట్ విస్తరణపై అధిష్ఠానంతో మరోసారి చర్చలు జరిపే అవకాశం ఉందని కాంగ్రెస్ వర్గాల్లో చర్చ జరుగుతోంది.
ఈ నేపథ్యంలో దసరా లోపు మంత్రివర్గ విస్తరణ జరిగే అవకాశం ఉందన్న ప్రచారం ప్రస్తుతం కాంగ్రెస్ శ్రేణుల్లో ఆసక్తిని పెంచుతోంది. దసరా కానుకగా ఆశావహులకు మంత్రి పదవులపై గుడ్న్యూస్ రావచ్చన్న సంకేతాలు వెళ్తున్నాయన్న చర్చ కూడా ఉంది. అయితే ఇప్పటివరకు కేబినెట్ విస్తరణ తేదీపై అధికారిక ప్రకటన వెలువడలేదు.మూడు మంత్రి పదవులకు ఎవరిని ఎంపిక చేస్తారు? ఏ ప్రాంతాలకు ప్రాధాన్యం దక్కుతుంది? సామాజిక సమీకరణాల్లో ఎలాంటి మార్పులు ఉంటాయి? అధిష్ఠానం సూచనలు ఎలా ఉండబోతున్నాయి? అనే అంశాలపై కాంగ్రెస్ నేతల్లో చర్చ కొనసాగుతోంది. అసెంబ్లీ సమావేశాల ముగింపు తర్వాత ఈ ఊహాగానాలకు ఎంతవరకు తెరపడుతుందో చూడాలి.
