తెలంగాణలో అధికారమే లక్ష్యం.. : బీజేపీ జాతీయ అధ్యక్షుడు నితిన్ నబీన్
హైదరాబాద్, జూన్ 28 (ప్రతినిధి):
వచ్చే తెలంగాణ అసెంబ్లీ ఎన్నికల్లో భారతీయ జనతా పార్టీ అధికారంలోకి రావడమే ప్రధాన లక్ష్యంగా పార్టీ శ్రేణులు కృషి చేయాలని బీజేపీ జాతీయ అధ్యక్షుడు నితిన్ నబీన్ పిలుపునిచ్చారు. ప్రజాసేవ, ప్రజా సమస్యలపై నిరంతర పోరాటాలు, క్షేత్రస్థాయిలో పార్టీ బలోపేతం ద్వారానే విజయాన్ని సాధించవచ్చని ఆయన పేర్కొన్నారు. ప్రతి కార్యకర్త పార్టీ విజయాన్ని వ్యక్తిగత బాధ్యతగా భావించి పనిచేయాలని సూచించారు.
ఆదిలాబాద్, ఆసిఫాబాద్, నిర్మల్, కామారెడ్డి, సిద్దిపేట, మెదక్, వనపర్తి, నాగర్కర్నూలు జిల్లాల్లో నూతనంగా నిర్మించిన బీజేపీ జిల్లా కార్యాలయాలను నితిన్ నబీన్ వర్చువల్ విధానంలో ప్రారంభించారు. అనంతరం పార్టీ నాయకులు, కార్యకర్తలను ఉద్దేశించి ప్రసంగిస్తూ తెలంగాణలో పార్టీ విస్తరణ, భవిష్యత్ కార్యాచరణపై దిశానిర్దేశం చేశారు.
దేశాన్ని “ఏక్ భారత్ – శ్రేష్ఠ భారత్” లక్ష్యంతో ప్రధానమంత్రి నరేంద్ర మోదీ సమర్థవంతంగా ముందుకు నడిపిస్తున్నారని నితిన్ నబీన్ అన్నారు. దేశ సమగ్రాభివృద్ధి, ప్రజా సంక్షేమం, మౌలిక సదుపాయాల విస్తరణ, పారదర్శక పాలన వంటి అంశాల్లో కేంద్ర ప్రభుత్వం అనేక సంస్కరణలు చేపట్టిందని తెలిపారు. అదే అభివృద్ధి నమూనాను తెలంగాణలో కూడా అమలు చేయాలంటే రాష్ట్రంలో బీజేపీ ప్రభుత్వం ఏర్పడాల్సిన అవసరం ఉందని అభిప్రాయపడ్డారు.
ప్రజాసేవే బీజేపీ ప్రధాన సిద్ధాంతమని పేర్కొన్న ఆయన, ప్రజల సమస్యలపై నిరంతరం పోరాడే పార్టీగానే బీజేపీ గుర్తింపు పొందిందన్నారు. అధికారంలోకి రావాలంటే ఎన్నికల సమయంలో మాత్రమే కాకుండా, ప్రతి గ్రామంలో, ప్రతి మండలంలో ప్రజలతో మమేకమై వారి సమస్యల పరిష్కారానికి కృషి చేయాలని కార్యకర్తలకు సూచించారు. ప్రజల విశ్వాసమే పార్టీకి అతిపెద్ద బలం అని ఆయన పేర్కొన్నారు.
పశ్చిమ బెంగాల్లో పార్టీ కార్యకర్తలు ఎదురుదెబ్బలను లెక్కచేయకుండా కష్టపడి పనిచేయడం వల్లే బీజేపీ గణనీయమైన విజయాలను నమోదు చేసుకుందని నితిన్ నబీన్ గుర్తు చేశారు. అదే స్ఫూర్తితో తెలంగాణలో కూడా పార్టీ శ్రేణులు పోరాట పంథాను అవలంబించాలని పిలుపునిచ్చారు. క్రమశిక్షణ, అంకితభావం, సమిష్టి కృషితో తెలంగాణలో కూడా త్వరలో కాషాయ జెండా ఎగురుతుందని ఆయన ఆశాభావం వ్యక్తం చేశారు.
డబుల్ ఇంజిన్ సర్కార్ ద్వారానే రాష్ట్ర అభివృద్ధి వేగవంతమవుతుందని నితిన్ నబీన్ పేర్కొన్నారు. కేంద్రంలో అమలవుతున్న అభివృద్ధి కార్యక్రమాలకు రాష్ట్ర ప్రభుత్వం కూడా సమన్వయంతో పనిచేస్తే ప్రజలకు మరింత ప్రయోజనం చేకూరుతుందని చెప్పారు. కేంద్ర ప్రభుత్వ సంక్షేమ పథకాలు, మౌలిక సదుపాయాల అభివృద్ధి కార్యక్రమాలు రాష్ట్రంలో సమర్థవంతంగా అమలైతే తెలంగాణ మరింత అభివృద్ధి చెందుతుందని వివరించారు.
బీజేపీ ఎదుగుదల గురించి ప్రస్తావిస్తూ, ఒకప్పుడు లోక్సభలో కేవలం రెండు సీట్లతో ప్రారంభమైన పార్టీ నేడు ప్రపంచంలోనే అతిపెద్ద ప్రజాస్వామ్య రాజకీయ పార్టీగా ఎదిగిందని ఆయన పేర్కొన్నారు. ఇది కార్యకర్తల అంకితభావం, నాయకత్వంపై ప్రజల విశ్వాసం ఫలితమని అన్నారు. అదే విధంగా తెలంగాణలో కూడా పార్టీ బలపడుతూ ప్రజల ఆదరణను పొందుతోందని తెలిపారు.
