కేంద్ర హోంశాఖ సహాయ మంత్రి, బీజేపీ నేత బండి సంజయ్ కుమారుడు బండి భగీరథ్పై నమోదైన పోక్సో కేసు ఇప్పుడు హైకోర్టు వరకు చేరింది. తనపై నమోదైన కేసులో ఎలాంటి వాస్తవం లేదని పేర్కొంటూ బండి భగీరథ్ తెలంగాణ హైకోర్టును ఆశ్రయించారు.
ఈ పిటిషన్పై తెలంగాణ హైకోర్టు వెకేషన్ బెంచ్ ఈ నెల 14వ తేదీన విచారణ చేపట్టనుంది. దీంతో ఈ కేసు న్యాయపరంగానే కాకుండా రాజకీయపరంగానూ ప్రాధాన్యత సంతరించుకుంది. ముఖ్యంగా బీజేపీ, అధికార కాంగ్రెస్ మధ్య ఇప్పటికే రాజకీయ ఆరోపణలు తీవ్రస్థాయిలో కొనసాగుతున్న తరుణంలో ఈ కేసు మరింత హాట్ టాపిక్గా మారింది.
మే 8వ తేదీన పేట్ బషీరాబాద్ పోలీస్ స్టేషన్లో బండి భగీరథ్పై పోక్సో చట్టం కింద కేసు నమోదైంది. 17 ఏళ్ల మైనర్ బాలికను భగీరథ్ వేధిస్తున్నాడంటూ బాలిక తల్లి పోలీసులకు ఫిర్యాదు చేసినట్లు సమాచారం. ఫిర్యాదును స్వీకరించిన పోలీసులు ప్రాథమిక విచారణ అనంతరం పోక్సో చట్టంలోని సంబంధిత సెక్షన్ల కింద కేసు నమోదు చేశారు.
పోలీసులు కేసు నమోదు చేసిన వెంటనే ఈ విషయం రాజకీయ వర్గాల్లో తీవ్ర చర్చకు దారితీసింది. అయితే కేసు నమోదు అయినప్పటి నుంచే భగీరథ్ తరఫు వర్గాలు ఈ ఆరోపణలను పూర్తిగా ఖండిస్తున్నాయి. భగీరథ్కు సంబంధించిన వర్గాలు ఈ కేసు వెనుక రాజకీయ కుట్ర ఉందని ఆరోపిస్తున్నాయి.
కావాలనే బండి సంజయ్ కుటుంబాన్ని లక్ష్యంగా చేసుకుని తప్పుడు ఆరోపణలు చేస్తున్నారని పేర్కొంటున్నారు. ఎలాంటి ఆధారాలు లేకుండానే కేసు నమోదు చేశారని, తమ వద్ద నిర్దోషిత్వాన్ని నిరూపించే పలు ఆధారాలు ఉన్నాయని వారు చెబుతున్నారు.
కేసును చట్టపరంగా ఎదుర్కొనేందుకు భగీరథ్ న్యాయపరమైన చర్యలు ప్రారంభించారు. అందులో భాగంగానే హైకోర్టులో క్వాష్ పిటిషన్ దాఖలు చేశారు. సాధారణంగా పోక్సో కేసుల్లో కోర్టులు అత్యంత జాగ్రత్తగా వ్యవహరిస్తాయి. అందువల్ల ఈ కేసులో హైకోర్టు ఎలాంటి అభిప్రాయం వ్యక్తం చేస్తుందన్నది ఇప్పుడు ఆసక్తికరంగా మారింది.
ఈ నెల 14న జరగనున్న విచారణపై అందరి దృష్టి నిలిచింది. హైకోర్టు కేసును కొట్టివేస్తుందా? లేక పోలీసు విచారణ కొనసాగించేందుకు అనుమతిస్తుందా? అన్నదానిపై ఉత్కంఠ నెలకొంది. న్యాయస్థానం నుంచి వచ్చే ఆదేశాలు కేసు భవిష్యత్తును నిర్ణయించే అవకాశముంది. ప్రస్తుతం ఈ వ్యవహారం తెలంగాణ రాజకీయాల్లో హాట్ టాపిక్గా మారగా.. హైకోర్టు తీర్పు తర్వాత ఈ కేసు మరింత మలుపులు తిరిగే అవకాశం ఉందని రాజకీయ విశ్లేషకులు భావిస్తున్నారు.
