వైసీపీ అధినేత, మాజీ ముఖ్యమంత్రి వైఎస్ జగన్ మరోసారి ప్రజల్లోకి వెళ్లేందుకు సిద్ధమవుతున్నారా? ‘పాదయాత్ర 2.0’ చేపట్టే ఆలోచనపై జగన్ కీలక వ్యాఖ్యలు చేసినట్లు సమాచారం. పర్చూరు నియోజకవర్గానికి చెందిన వైసీపీ నేతలతో జరిగిన సమావేశంలో వచ్చే ఏడాది సెప్టెంబర్ లేదా అక్టోబర్లో పాదయాత్ర చేపట్టే అవకాశం ఉందని ఆయన ప్రస్తావించినట్లు తెలుస్తోంది. దీంతో వైసీపీ శ్రేణుల్లో ఈ అంశంపై చర్చ మొదలైంది.గతంలో జగన్ చేపట్టిన ‘ప్రజా సంకల్ప యాత్ర’ ఆయన రాజకీయ ప్రస్థానంలో కీలక మలుపుగా నిలిచింది. రాష్ట్రవ్యాప్తంగా సుదీర్ఘంగా సాగిన ఆ పాదయాత్ర ద్వారా జగన్ వివిధ వర్గాల ప్రజలను నేరుగా కలుసుకున్నారు. ప్రజల సమస్యలను తెలుసుకోవడంతో పాటు.. పార్టీ భవిష్యత్ రాజకీయ కార్యాచరణకు అవసరమైన అంశాలను సేకరించారు.
3,648 కిలోమీటర్ల ప్రజా సంకల్ప యాత్ర
వైఎస్ జగన్ 2017 నవంబర్ 6న కడప జిల్లా ఇడుపులపాయలో తన తండ్రి వైఎస్ రాజశేఖరరెడ్డి సమాధి వద్ద ‘ప్రజా సంకల్ప యాత్ర’ను ప్రారంభించారు. దాదాపు 16 నెలల పాటు సాగిన ఈ యాత్ర 2019 జనవరి 9న శ్రీకాకుళం జిల్లా ఇచ్ఛాపురంలో ముగిసింది. ఈ పాదయాత్రలో జగన్ సుమారు 3,648 కిలోమీటర్లు నడిచారు.యాత్రలో భాగంగా అప్పటి 13 జిల్లాల్లోని 134 అసెంబ్లీ నియోజకవర్గాలు, 231 మండలాలు, 2,516 గ్రామాల్లో జగన్ పర్యటించారు. ప్రతిరోజూ సగటున 12 నుంచి 20 కిలోమీటర్ల మేర నడుస్తూ ప్రజలను కలిశారు. రైతులు, మత్స్యకారులు, ఆటో డ్రైవర్లు, కార్మికులు, అంగన్వాడీ సిబ్బంది, నిరుద్యోగ యువతతో పాటు వివిధ సామాజిక వర్గాల ప్రజలతో ఆయన నేరుగా మాట్లాడారు.పాదయాత్రలో 500, 1,000, 2,000, 3,000 కిలోమీటర్ల మైలురాళ్లు ప్రత్యేక ఆకర్షణగా నిలిచాయి. యాత్ర సందర్భంగా 124 బహిరంగ సభలు, 55 ఆత్మీయ సమ్మేళనాలు నిర్వహించినట్లు వైసీపీ వర్గాలు పేర్కొన్నాయి.
కోడికత్తి ఘటనతో విరామం
జగన్ ప్రజా సంకల్ప యాత్రలో ఉన్న సమయంలో 2018 అక్టోబర్ 25న విశాఖపట్నం విమానాశ్రయంలో ఆయనపై కోడికత్తితో దాడి జరిగిన ఘటన అప్పట్లో తీవ్ర రాజకీయ చర్చకు దారితీసింది. ఈ ఘటన అనంతరం పాదయాత్రకు కొంతకాలం విరామం ఏర్పడింది.ప్రజా సంకల్ప యాత్రలో ప్రజల నుంచి తెలుసుకున్న సమస్యలు, వారి ఆకాంక్షల ఆధారంగా వైసీపీ ఎన్నికల హామీలను రూపొందించింది. ముఖ్యంగా ‘నవరత్నాలు’ పేరుతో రూపొందించిన హామీలు 2019 ఎన్నికల ప్రచారంలో కీలకంగా మారాయి.రైతు భరోసా, అమ్మఒడి, వైఎస్సార్ ఆసరా, వైఎస్సార్ చేయూత, విద్యా దీవెన, వసతి దీవెన, ఆరోగ్యశ్రీ, జలయజ్ఞం వంటి పథకాలను వైసీపీ విస్తృతంగా ప్రచారం చేసింది. పాదయాత్ర ముగింపు సందర్భంగా ఇచ్ఛాపురంలో 91 అడుగుల పైలాన్ను కూడా ఆవిష్కరించారు.
2019లో ఘన విజయం
ప్రజా సంకల్ప యాత్ర ముగిసిన కొద్ది నెలలకే జరిగిన 2019 అసెంబ్లీ ఎన్నికల్లో వైసీపీ ఘన విజయం సాధించింది. ఆ ఎన్నికల్లో వైసీపీ 151 అసెంబ్లీ స్థానాలు, 22 లోక్సభ స్థానాలను గెలుచుకుంది. దీంతో జగన్ రాజకీయ ప్రస్థానంలో ప్రజా సంకల్ప యాత్రకు ప్రత్యేక ప్రాధాన్యత ఏర్పడింది.ఇప్పుడు అదే తరహాలో మరోసారి పాదయాత్ర చేపట్టే ఆలోచనను జగన్ ప్రస్తావించినట్లు సమాచారం. వచ్చే ఏడాది సెప్టెంబర్ లేదా అక్టోబర్లో ‘పాదయాత్ర 2.0’ ప్రారంభించే అవకాశం ఉందన్న సంకేతాలు వైసీపీ నాయకులు, కార్యకర్తల్లో ఆసక్తిని పెంచుతున్నాయి.
అయితే పాదయాత్ర ఏ ప్రాంతం నుంచి ప్రారంభమవుతుంది? ఎన్ని రోజులు కొనసాగుతుంది? ఏ ప్రాంతాలను కవర్ చేస్తారు? అనే అంశాలపై ఇంకా స్పష్టత రావాల్సి ఉంది. ప్రస్తుతానికి జగన్ చేసిన వ్యాఖ్యల ఆధారంగానే ‘పాదయాత్ర 2.0’పై రాజకీయ వర్గాల్లో చర్చ జరుగుతోంది.మరోసారి సుదీర్ఘ పాదయాత్ర ద్వారా ప్రజల్లోకి వెళ్లి పార్టీని బలోపేతం చేయాలన్నది జగన్ వ్యూహమా? అనే చర్చ కూడా మొదలైంది. పాదయాత్ర 2.0పై అధికారికంగా పూర్తి కార్యాచరణ వెల్లడైతే.. వైసీపీ భవిష్యత్ రాజకీయ వ్యూహంపై మరింత స్పష్టత వచ్చే అవకాశం ఉంది.
