తెలంగాణ అసెంబ్లీ వద్ద సోమవారం చోటుచేసుకున్న ఉద్రిక్త పరిణామాల నేపథ్యంలో బీఆర్ఎస్ ఖమ్మం ఎమ్మెల్సీ తాతా మధును పోలీసులు అరెస్ట్ చేశారు. అసెంబ్లీ స్పీకర్ గడ్డం ప్రసాద్ కుమార్పై అనుచిత వ్యాఖ్యలు చేశారన్న ఆరోపణలపై నమోదైన కేసులో భాగంగా మంగళవారం తెల్లవారుజామున పోలీసులు ఆయనను అదుపులోకి తీసుకున్నారు.హైదర్గూడలోని ఓల్డ్ ఎమ్మెల్యే క్వార్టర్స్లోని ఫ్లాట్ నంబర్ 11లో ఉన్న తాతా మధు నివాసానికి మంగళవారం తెల్లవారుజామున టాస్క్ఫోర్స్ పోలీసులు చేరుకున్నారు. ఎమ్మెల్సీని అదుపులోకి తీసుకునే సమయంలో క్వార్టర్స్ వద్ద కొంతసేపు ఉద్రిక్త వాతావరణం నెలకొంది. అనంతరం పోలీసులు తాతా మధును తమ అదుపులోకి తీసుకున్నట్లు సమాచారం.
ఈ పరిణామాలకు అసెంబ్లీ ప్రాంగణంలో సోమవారం చోటుచేసుకున్న ఉద్రిక్తతలే కారణంగా తెలుస్తోంది. బీఆర్ఎస్ ఎమ్మెల్యేలు, ఎమ్మెల్సీలు నిరసన చేపట్టిన సమయంలో పరిస్థితి ఉద్రిక్తంగా మారింది. ఈ క్రమంలో తాతా మధు స్పీకర్ గడ్డం ప్రసాద్ కుమార్ను ఉద్దేశించి అనుచిత వ్యాఖ్యలు చేశారన్న ఆరోపణలు వచ్చాయి. ఆ వ్యాఖ్యలకు సంబంధించిన వీడియోలు సోషల్ మీడియాలో వైరల్ కావడంతో వివాదం మరింత ముదిరింది.ఈ వ్యవహారంపై స్పీకర్ ఓఎస్డీ పోలీసులకు ఫిర్యాదు చేసినట్లు సమాచారం. ఫిర్యాదు ఆధారంగా పోలీసులు కేసు నమోదు చేసి దర్యాప్తు చేపట్టారు. అనంతరం మంగళవారం తెల్లవారుజామున తాతా మధును అదుపులోకి తీసుకున్నారు.
అయితే తనపై వచ్చిన ఆరోపణలపై తాతా మధు ఇప్పటికే వివరణ ఇచ్చారు. శాసనసభ స్పీకర్ గడ్డం ప్రసాద్ కుమార్ అంటే తనకు గౌరవం ఉందని స్పష్టం చేశారు. తాను స్పీకర్ను ఉద్దేశించి ఎలాంటి వ్యాఖ్యలు చేయలేదని పేర్కొన్నారు. తన మాటలను వేరే విధంగా అర్థం చేసుకున్నట్లయితే వాటిని ఉపసంహరించుకుంటున్నానని, తన వ్యాఖ్యలపై విచారం వ్యక్తం చేస్తున్నానని తెలిపారు.అసెంబ్లీ వద్ద తనపై దాడి జరిగిందని తాతా మధు ఆరోపించారు. తనపై దాడి చేసి గొంతు నొక్కే ప్రయత్నం చేశారని, ఆ సమయంలో ఆవేశంలో తనను దాడి చేసిన వారిని ఉద్దేశించి మాత్రమే వ్యాఖ్యలు చేశానని వివరణ ఇచ్చారు. స్పీకర్ను ఉద్దేశించి తాను మాట్లాడలేదని మరోసారి స్పష్టం చేశారు.
మరోవైపు.. ఈ ఘటనపై పోలీసులు దర్యాప్తు కొనసాగిస్తున్నారు. సోషల్ మీడియాలో వైరల్ అవుతున్న వీడియోలు, అసెంబ్లీ వద్ద అందుబాటులో ఉన్న దృశ్యాలు, ఇతర ఆధారాలను పరిశీలించే అవకాశం ఉంది. వ్యాఖ్యలు ఎవరిని ఉద్దేశించి చేశారనే అంశంతో పాటు ఘటనకు సంబంధించిన పూర్తి పరిస్థితులను దర్యాప్తులో పోలీసులు పరిశీలించనున్నారు.ఇటీవల అసెంబ్లీ వద్ద చోటుచేసుకున్న ఉద్రిక్తతల నేపథ్యంలో బీఆర్ఎస్ నేతలపై వరుసగా పోలీసు కేసులు నమోదవుతున్నాయి. ఇప్పటికే పలువురు బీఆర్ఎస్ నేతలపై అసెంబ్లీ వద్ద పోలీసులతో ఘర్షణకు సంబంధించిన కేసులు నమోదైనట్లు పోలీసులు వెల్లడించారు. ఇప్పుడు స్పీకర్పై అనుచిత వ్యాఖ్యల ఆరోపణలతో తాతా మధును అరెస్ట్ చేయడం రాజకీయంగా కూడా చర్చనీయాంశంగా మారింది.
ప్రస్తుతం తాతా మధు అరెస్ట్పై బీఆర్ఎస్ నేతలు ఎలా స్పందిస్తారన్నది ఆసక్తికరంగా మారింది. మరోవైపు తన వ్యాఖ్యలకు తాతా మధు ఇచ్చిన వివరణ, వైరల్ వీడియోల్లో కనిపిస్తున్న దృశ్యాలు, పోలీసుల దర్యాప్తు ఆధారంగా ఈ వ్యవహారంలో తదుపరి చర్యలు ఉండే అవకాశం ఉంది.
