తెలంగాణ రాష్ట్రంలో ప్రజలకు కీలక సేవలను అందించే మీ సేవ కేంద్రాలు తాత్కాలికంగా నిలిపివేయబడ్డాయి. రాష్ట్రవ్యాప్తంగా 36 గంటలపాటు మీ-సేవా సేవలు అందుబాటులో ఉండవని అధికారులు వెల్లడించారు.కొత్త సాఫ్ట్వేర్ అప్డేట్లు, సిస్టమ్ మెయింటెనెన్స్ పనుల కారణంగా ఈ నిర్ణయం తీసుకున్నట్లు అధికారులు తెలిపారు. ఈ నేపథ్యంలో మీ-సేవా కేంద్రాలు మాత్రమే కాకుండా, సంబంధిత వెబ్సైట్ కూడా పూర్తిగా షట్డౌన్ చేయబడింది.
ప్రభుత్వ సేవలను డిజిటల్ రూపంలో అందించే ప్రధాన వేదికగా మీ-సేవ కీలక పాత్ర పోషిస్తోంది. కులం, ఆదాయం, నివాస ధ్రువపత్రాలు, వివిధ లైసెన్సులు, పన్నుల చెల్లింపులు వంటి అనేక సేవలను ప్రజలు ఈ వేదిక ద్వారా పొందుతున్నారు. అలాంటి ముఖ్యమైన సేవలు తాత్కాలికంగా నిలిపివేయబడటంతో ప్రజలకు కొంత అసౌకర్యం కలగవచ్చని అధికారులు తెలిపారు.అయితే ఈ మెయింటెనెన్స్ పనులు పూర్తయ్యిన తర్వాత సేవలు మరింత వేగవంతంగా, సమర్థవంతంగా అందుబాటులోకి వస్తాయని అధికారులు పేర్కొన్నారు. కొత్త సాఫ్ట్వేర్ ద్వారా సాంకేతిక లోపాలను తగ్గించి, వినియోగదారులకు మెరుగైన అనుభవాన్ని అందించడమే లక్ష్యంగా ఈ అప్డేట్ చేపట్టినట్లు వెల్లడించారు.
అధికారుల ప్రకారం, ఆదివారం ఉదయం 8 గంటల తర్వాత మీ-సేవ వెబ్సైట్ మళ్లీ యాక్టివ్ అవుతుంది. ఆ తర్వాత అన్ని సేవలు యథావిధిగా ప్రారంభమవుతాయి. ప్రజలు అత్యవసర సేవలు తప్ప మిగతా పనులను ఆ సమయం వరకు వాయిదా వేసుకోవాలని సూచించారు.ఇటీవల తెలంగాణ ప్రభుత్వం డిజిటల్ సేవలను విస్తరించడంపై ప్రత్యేక దృష్టి సారిస్తోంది. సేవలను ఒకే వేదికపై అందించేందుకు వివిధ మార్పులు చేపడుతోంది. ఈ క్రమంలో మీ-సేవ వ్యవస్థను మరింత ఆధునికీకరించే భాగంగా ఈ మెయింటెనెన్స్ పనులు జరుగుతున్నాయి.
