తెలంగాణలో 22-A నిషేధిత జాబితాలో ఉన్న కొన్ని ఆస్తుల రిజిస్ట్రేషన్లకు ప్రభుత్వం మార్గం సుగమం చేసింది. చెల్లుబాటు అయ్యే లేఅవుట్, భవన నిర్మాణం లేదా అపార్ట్మెంట్ అనుమతులు కలిగిన ఓపెన్ ప్లాట్లు, ఇళ్లు, ఫ్లాట్లను నిర్దిష్ట షరతులతో రిజిస్ట్రేషన్ చేసుకునే అవకాశం కల్పించింది. ఈ మేరకు రెవెన్యూ శాఖ సెప్టెంబర్ 24న ఆదేశాలు జారీ చేసినట్లు ప్రభుత్వం వెల్లడించింది.కొత్త విధానం ప్రకారం 22-A పరిధిలో ఉన్న ఆస్తికి సంబంధిత ప్రభుత్వ సంస్థల నుంచి చెల్లుబాటు అయ్యే అనుమతులు ఉండాలి. ముఖ్యంగా GHMC, HMDA, DTCP, మున్సిపాలిటీలు లేదా ఇతర సంబంధిత పట్టణ, గ్రామీణ స్థానిక సంస్థలు మంజూరు చేసిన లేఅవుట్, బిల్డింగ్ లేదా అపార్ట్మెంట్ అనుమతులను పరిగణనలోకి తీసుకోనున్నారు.అయితే కేవలం అనుమతి పత్రం ఉన్నంత మాత్రాన రిజిస్ట్రేషన్ పూర్తవుతుందని ప్రభుత్వం చెప్పలేదు. అవసరమైన అనుమతులు పొందిన తర్వాత జరిగిన లావాదేవీలకు సంబంధించిన చెల్లుబాటు అయ్యే లింక్ డాక్యుమెంట్ను దరఖాస్తుదారులు సమర్పించాల్సి ఉంటుంది. ఆస్తికి సంబంధించిన రికార్డులు, అనుమతులు, భూమి స్వభావం తదితర అంశాలను పరిశీలించిన తర్వాతే వ్యక్తిగత కేసులపై నిర్ణయం తీసుకుంటారు.
వివాదాస్పద ఆస్తులపై ప్రత్యేక పరిశీలన
22-A పరిధిలో ఉన్న అన్ని ఆస్తులను ఒకే విధంగా పరిగణించబోమని ప్రభుత్వం స్పష్టం చేసింది. భూమి స్వభావం, అందుబాటులో ఉన్న రెవెన్యూ రికార్డులు, సంబంధిత సంస్థల అనుమతులు, న్యాయపరమైన అంశాలను పరిశీలించి అర్హతను నిర్ణయించనున్నారు.న్యాయస్థానాల్లో వివాదాలు పెండింగ్లో ఉన్న ఆస్తుల విషయంలో కోర్టు ఉత్తర్వులు, కేసు పరిధి, ఇతర న్యాయపరమైన అంశాలను పరిగణనలోకి తీసుకుని అధికారులు నిర్ణయం తీసుకోనున్నారు. దీంతో 22-A జాబితాలో ఉన్న ప్రతి ఆస్తికి ఒకే విధమైన రిజిస్ట్రేషన్ ప్రక్రియ ఉండదని స్పష్టమవుతోంది.
జిల్లా స్థాయి కమిటీల ఏర్పాటు
రిజిస్ట్రేషన్ ప్రక్రియలో తలెత్తే సమస్యలు, సందేహాలు, అభ్యంతరాలను పరిష్కరించేందుకు ప్రభుత్వం జిల్లా స్థాయి కమిటీలను ఏర్పాటు చేసింది. జిల్లా కలెక్టర్ ఈ కమిటీకి అధ్యక్షత వహిస్తారు. అదనపు కలెక్టర్ (లోకల్ బాడీస్), జిల్లా రిజిస్ట్రార్తో పాటు సంబంధిత HMDA, మున్సిపల్ సంస్థ లేదా గ్రామీణ స్థానిక సంస్థ ప్రతినిధులు కమిటీలో సభ్యులుగా ఉంటారు.22-A నిబంధనల అమలులో తలెత్తే సమస్యలను ఈ కమిటీల దృష్టికి తీసుకెళ్లి, సంబంధిత రికార్డులు మరియు అనుమతులను పరిశీలించిన అనంతరం పరిష్కరించే విధానాన్ని ప్రభుత్వం రూపొందించింది.ఈ నిర్ణయం 22-A నిషేధిత జాబితాలో ఆస్తులు ఉన్నప్పటికీ ప్రభుత్వ సంస్థల నుంచి అవసరమైన అనుమతులు పొందిన యజమానులకు రిజిస్ట్రేషన్ ప్రక్రియలో ఉపశమనం కల్పించే ఉద్దేశంతో తీసుకున్నట్లు రెవెన్యూ శాఖ తెలిపింది.ఇదిలా ఉండగా, 22-A సమస్యల పరిష్కారానికి ప్రభుత్వం ఇప్పటికే రాష్ట్రస్థాయిలో హైపవర్ కమిటీని ఏర్పాటు చేసింది. సెప్టెంబర్ 17న జారీ చేసిన GO Ms. 564 ప్రకారం CCLA డీఎస్ లోకేష్ కుమార్ నేతృత్వంలో ఈ కమిటీని ఏర్పాటు చేసినట్లు నివేదికలు పేర్కొన్నాయి.
