సురక్షిత నిమజ్జనమే మా సంకల్పం : మల్కాజ్‌గిరి సీపీ సుమతి

గణేష్ నిమజ్జనం సందర్భంగా సఫిల్‌గూడ చెరువు వద్ద చేపట్టిన భద్రతా, సౌకర్యాల ఏర్పాట్లను మల్కాజ్‌గిరి సీపీ శ్రీమతి బి. సుమతి, ఐపీఎస్. సమీక్షించారు. నిమజ్జనానికి పెద్ద సంఖ్యలో భక్తులు తరలివచ్చే నేపథ్యంలో ఎలాంటి అవాంఛనీయ ఘటనలు చోటుచేసుకోకుండా పోలీస్ శాఖ చేపట్టిన ఏర్పాట్లను ఆమె పరిశీలించారు.ఈ సందర్భంగా బందోబస్తు, సీసీ కెమెరాల నిఘా, క్రేన్లు, బారికేడ్లు, లైటింగ్, ట్రాఫిక్ నియంత్రణ, రద్దీ నిర్వహణ తదితర అంశాలపై సీపీ అధికారులతో సమీక్ష నిర్వహించారు. నిమజ్జన ప్రాంతంలో భక్తులకు ఎలాంటి ఇబ్బందులు కలగకుండా అవసరమైన అన్ని ముందస్తు చర్యలు చేపట్టాలని సంబంధిత అధికారులకు సూచించారు.అనంతరం భక్తులను ఉద్దేశించి సీపీ బి. సుమతి మాట్లాడుతూ గణేష్ నిమజ్జన కార్యక్రమాన్ని ప్రతి ఒక్కరూ భక్తిశ్రద్ధలతో, శాంతియుతంగా, సురక్షితంగా నిర్వహించుకోవాలని సూచించారు. నిమజ్జనానికి వచ్చే భక్తులు పోలీసులకు సహకరించాలని, రద్దీ ప్రాంతాల్లో అప్రమత్తంగా వ్యవహరించాలని కోరారు.నిమజ్జన ప్రక్రియ సజావుగా కొనసాగేందుకు పోలీసు సిబ్బంది, సంబంధిత ప్రభుత్వ శాఖలు సమన్వయంతో పనిచేయాలని సీపీ ఆదేశించారు. భక్తుల భద్రతతో పాటు వారి సౌకర్యాలకు ప్రాధాన్యత ఇవ్వాలని, రద్దీని క్రమబద్ధీకరించేందుకు అవసరమైన చర్యలను ఎప్పటికప్పుడు చేపట్టాలని సూచించారు.చెరువు పరిసరాల్లో ఏర్పాటు చేసిన బారికేడ్లు, లైటింగ్, క్రేన్లు, సీసీ కెమెరాల పర్యవేక్షణ తదితర అంశాలను అధికారులు సీపీకి వివరించారు. నిమజ్జన సమయంలో భక్తుల రాకపోకలు, వాహనాల కదలికలు క్రమబద్ధంగా ఉండేలా ట్రాఫిక్ నియంత్రణ చర్యలను పటిష్టంగా అమలు చేయాలని ఆమె సూచించారు.ప్రజలు, భక్తులు పోలీసులకు సహకరిస్తూ నిమజ్జన కార్యక్రమాన్ని ప్రశాంత వాతావరణంలో నిర్వహించుకోవాలని పోలీస్ శాఖ విజ్ఞప్తి చేసింది.“భక్తుల భద్రతే మా బాధ్యత – సురక్షిత నిమజ్జనమే మా సంకల్పం” అనే సందేశంతో మల్కాజ్‌గిరి పోలీస్ శాఖ నిమజ్జన ఏర్పాట్లపై ప్రత్యేక దృష్టి సారించింది.