నిజం చెప్పాలంటే.. మేము ఓడిపోయింది అందుకే.. న్యూజిలాండ్ కెప్టెన్ మిచెల్ సాంట్న‌ర్ కామెంట్లు..

Mitchell Santner : వెల్లింగ్ట‌న్ వేదిక‌గా భార‌త్‌తో జ‌రిగిన రెండో వ‌న్డే మ్యాచ్‌లో న్యూజిలాండ్ డ‌క్‌వ‌ర్త్ లూయిస్ ప‌ద్ద‌తిలో 4 ప‌రుగుల తేడాతో ఓడిపోయింది. దీంతో ఐదు మ్యాచ్‌ల సిరీస్‌లో 0-2 తేడాతో వెనుక‌బ‌డిపోయింది. బ్యాటింగ్ చేసేందుకు పిచ్ క‌ఠినంగా ఉంద‌ని, భార‌త బౌల‌ర్లు అద్భుతంగా బంతులు వేయ‌డంతోనే తాము ఓడిపోయామ‌ని న్యూజిలాండ్ కెప్టెన్ మిచెల్ సాంట్న‌ర్ తెలిపాడు.

వ‌ర్షం కార‌ణంగా మ్యాచ్‌ను 47 ఓవ‌ర్ల‌కు కుదించ‌గా.. తొలుత‌ బ్యాటింగ్ చేసిన న్యూజిలాండ్ 41 ఓవ‌ర్ల‌లో 134 ప‌రుగుల‌కు ఆలౌటైంది. కివీస్ బ్యాట‌ర్ల‌లో డారిల్ మిచెల్ (55; 104 బంతుల్లో 5 ఫోర్లు, 2 సిక్స‌ర్లు) హాఫ్ సెంచ‌రీ చేయ‌గా.. కెప్టెన్ మిచెల్ సాంట్న‌ర్ (31; 38 బంతుల్లో 1 ఫోర్‌, 2 సిక్స‌ర్లు) రాణించాడు. టీమ్ఇండియా బౌల‌ర్ల‌లో గుర్నూర్ బ్రార్ నాలుగు వికెట్లు తీశాడు. అకిల్ న‌బీ, అక్ష‌ర్ ప‌టేల్, అన్షుల్ కాంబోబ్ త‌లా రెండు వికెట్లు ప‌డ‌గొట్టారు.

ఆ త‌రువాత‌ 135 ప‌రుగుల ల‌క్ష్య ఛేద‌న‌లో భార‌త్ 26 ఓవ‌ర్ల‌లో 7 వికెట్ల న‌ష్టానికి 113 ప‌రుగులు చేసింది. ఈ ద‌శ‌లో వ‌రుణుడు ఆటంకం క‌లిగించాడు. ఎంత సేప‌టికి వ‌ర్షం త‌గ్గ‌లేదు. భార‌త్ 20 ఓవ‌ర్లు ఆడ‌డంతో డ‌క్ వ‌ర్త్ లూయిస్ ప‌ద్ద‌తిని ఉప‌యోగించారు. 26 ఓవ‌ర్ల‌కు డ‌క్ వ‌ర్త్ లూయిస్ ప‌ద్ద‌తిలో టీమ్ఇండియా 109 ప‌రుగులుగా చేయాల్సి ఉండ‌గా.. 4 ప‌రుగులు ఎక్కువ‌గానే చేసింది. దీంతో భార‌త్ విజేత‌గా నిలిచింది.

రెండో వ‌న్డేలో ఓడిపోవ‌డంపై మ్యాచ్ అనంత‌రం న్యూజిలాండ్ కెప్టెన్ మిచెల్ సాంట్న‌ర్ స్పందించాడు. ఇది చాలా కఠినమైన పిచ్. ఇందులో ఎలాంటి సందేహం లేదు. భారత బౌలర్లు అద్భుతంగా బౌలింగ్ చేశారు. ముఖ్యంగా ఇన్నింగ్స్ ఆరంభంలో మాపై ఒత్తిడి పెంచారు. ఇన్నింగ్స్‌ ఆరంభంలోనే వికెట్లు కోల్పోవడం ఎప్పుడూ మంచిది కాదు. అయితే.. తొలి ఇన్నింగ్స్‌ ముగిసే సమయానికి మేం సాధించిన స్కోరు కొంత తక్కువగానే ఉందని భావించాం. పిచ్‌పై బౌలర్లకు సహకారం ఉండటంతో మా బౌలర్లు కూడా అద్భుతంగా రాణించారు.

మైదానంలోకి వెళ్లి పరిస్థితులు వాటంతట అవే అనుకూలిస్తాయని ఎదురుచూడటం సరికాదు. మేం బంతితో అద్భుతంగా రాణించాం. మంచి ఆరంభం లభించింది. లక్ష్యాన్ని ఛేదించాలంటే ప్రత్యర్థి టాప్‌ ఆర్డర్‌ వికెట్లు తీయడం కీలకమని మాకు తెలుసు. మేం అదే చేశాం. ఆ తర్వాత బౌలర్లు తమ తమ స్పెల్స్‌లో కీలక వికెట్లు తీస్తూ ప్రత్యర్థిని ఒత్తిడిలోకి నెట్టారు. వన్డే క్రికెట్‌లో ఇది చాలా ముఖ్యం. అని మిచెల్ సాంట్న‌ర్ అన్నాడు.

తాను బౌలింగ్ చేయ‌క‌పోవ‌డంపై..

ఇక ఈ మ్యాచ్‌లో తాను బౌలింగ్ చేయ‌క‌పోవ‌డంపై మిచెల్ సాంట్న‌ర్ మాట్లాడాడు. నిజం చెప్పాలంటే.. నేను కొద్దిసేపు వార్మప్‌ చేశాను. అయితే అప్పటికే మా బౌలర్లు బాగా రాణిస్తుండటంతో వారికే బాధ్యత అప్పగించాను. ఈ పిచ్‌పై సీమర్లు చాలా ప్రభావవంతంగా బౌలింగ్‌ చేశారు. అక్షర్‌ పటేల్‌ కూడా చక్కగా బౌలింగ్‌ చేశాడు. భారత పేసర్లు కూడా మంచి లైన్‌ అండ్‌ లెంగ్త్‌తో బంతులేస్తూ మమ్మల్ని ఇబ్బంది పెట్టారు.

బ్యాటింగ్‌ యూనిట్‌గా ఈ పిచ్‌ ఎంత క్లిష్టంగా ఉంటుందో మాకు ముందే తెలుసు. అయినప్పటికీ.. ఎలాగోలా 160 లేదా 180 పరుగులు సాధించి ఉంటే మ్యాచ్‌లో పోరాడేందుకు అవకాశం ఉండేది. భారత బౌలర్లు కూడా చాలా బాగా బౌలింగ్‌ చేశారు. వాతావరణ పరిస్థితుల కారణంగా బ్యాటింగ్‌ చేయడం మరింత కష్టంగా మారింది. ప్రత్యర్థి బౌలర్లు ఈ పరిస్థితులను చక్కగా ఉపయోగించుకున్నారు. అని మిచెల్ సాంట్న‌ర్ తెలిపాడు.

ఇక‌ టిక్నర్ విషయానికి వస్తే అత‌డు త్వరలోనే కోలుకుంటాడని ఆశిస్తున్న‌ట్లు చెప్పాడు. ఇటీవ‌ల అత‌డు కన్‌కషన్ గురి అయ్యాడు కాబ‌ట్టి కోలుకునేందుకు కొంత స‌మ‌యం ఇవ్వ‌డం మంచిది అని సాంట్న‌ర్ అన్నాడు.