దేశవ్యాప్తంగా సెప్టెంబర్ 5న ఉపాధ్యాయ దినోత్సవాన్ని జరుపుకుంటున్న సందర్భంగా ప్రధాని నరేంద్ర మోదీ జాతీయ ఉపాధ్యాయ అవార్డు విజేతలతో ప్రత్యేకంగా సంభాషించారు. విద్యార్థుల భవిష్యత్తును తీర్చిదిద్దడంలో ఉపాధ్యాయుల పాత్ర, పిల్లల్లో దాగి ఉన్న ప్రతిభను గుర్తించడం, స్క్రీన్ టైమ్ను తగ్గించడం, సృజనాత్మకతను పెంపొందించడం వంటి పలు అంశాలపై ఆయన ఉపాధ్యాయులతో చర్చించారు. ఉపాధ్యాయుల అంకితభావాన్ని ప్రధాని అభినందించారు.
ప్రతి విద్యార్థిలో ప్రత్యేక ప్రతిభ
విద్యార్థుల సామర్థ్యాలను గుర్తించే విషయంలో ఉపాధ్యాయుల పాత్రపై ప్రధాని మోదీ ప్రత్యేకంగా మాట్లాడారు. ఒకరిద్దరు విద్యార్థులు చదువులో వెనుకబడినా.. ప్రతి ఒక్కరిలోనూ ఏదో ఒక ప్రత్యేక ప్రతిభ ఉంటుందని అన్నారు. ఆ ప్రతిభను గుర్తించి, దాన్ని అభివృద్ధి చేసే దిశగా ఉపాధ్యాయులు కృషి చేయాలని సూచించారు.
ప్రతి విద్యార్థికి ప్రత్యేకమైన సామర్థ్యాలు, సవాళ్లు ఉంటాయని అవార్డు గ్రహీతలు ప్రధానికి వివరించారు. తరగతి గదిలో ప్రతి విద్యార్థి ప్రత్యేకతను గుర్తించి, వారి సామర్థ్యాలను వెలికితీసేందుకు ప్రయత్నిస్తున్నామని తెలిపారు.
బ్రెస్ట్ క్యాన్సర్ అవగాహనపై చర్చ
సంభాషణలో ఓ ఉపాధ్యాయురాలు తన పరిశోధన అంశం బ్రెస్ట్ క్యాన్సర్ అవగాహన అని ప్రధాని మోదీకి వివరించారు. మహిళలు ఈ అంశంపై బహిరంగంగా మాట్లాడేందుకు ఇప్పటికీ సంకోచిస్తున్నారని, అవగాహన కార్యక్రమాలు నిర్వహిస్తూ అవసరమైన సమయంలో వైద్యుల సలహా తీసుకునేలా ప్రోత్సహిస్తున్నామని చెప్పారు.
దీనిపై ప్రధాని స్పందిస్తూ.. తాను వారణాసి ఎంపీగా ఉన్న సమయంలో అక్కడ నిర్వహించిన బ్రెస్ట్ క్యాన్సర్ అవగాహన కార్యక్రమాన్ని గుర్తుచేసుకున్నట్లు తెలిపారు. మహిళలు స్వయంగా ముందుకు వచ్చి పరీక్షలు చేయించుకోవడం సానుకూల పరిణామమని పేర్కొన్నారు. ఒకే రోజులో అత్యధిక మందికి పరీక్షలు నిర్వహించిన కార్యక్రమం గిన్నిస్ వరల్డ్ రికార్డులో నమోదైన విషయాన్ని కూడా ప్రస్తావించారు.
పిల్లల్లో స్క్రీన్ టైమ్ తగ్గించాలి
పిల్లల్లో పెరుగుతున్న మొబైల్, డిజిటల్ పరికరాల వినియోగంపై కూడా ప్రధాని మోదీ ఆందోళన వ్యక్తం చేశారు. అధిక స్క్రీన్ టైమ్ ఒక రకమైన వ్యసనంగా మారే అవకాశం ఉందని పేర్కొంటూ.. పిల్లలను ఆటలు, క్రీడల వైపు మళ్లించాలని సూచించారు.
పిల్లలు ఎక్కువ సమయం మైదానాల్లో గడిపేలా ప్రోత్సహించాలని, శారీరక కార్యకలాపాలతో పాటు సృజనాత్మకతను పెంపొందించే కార్యక్రమాలను పాఠశాలల్లో నిర్వహించాలని ఉపాధ్యాయులకు సూచించారు. విద్యార్థుల సమగ్ర అభివృద్ధికి చదువుతో పాటు క్రీడలు, సృజనాత్మక కార్యకలాపాలు కూడా అవసరమని ఆయన పేర్కొన్నారు.
పుస్తకాలు, సిలబస్ దాటి పిల్లల జీవితాల్లోకి వెళ్లాలి
ఉపాధ్యాయులతో సంభాషణ సందర్భంగా ప్రధాని మోదీ కీలక సందేశం ఇచ్చారు. కేవలం పుస్తకాలు, సిలబస్కు పరిమితం కాకుండా పిల్లల జీవితాలను అర్థం చేసుకోవాలని అన్నారు. విద్యార్థుల భవిష్యత్తును తీర్చిదిద్దడంలో ఉపాధ్యాయులు కీలక పాత్ర పోషిస్తారని పేర్కొన్నారు.
పిల్లల్లో సహజంగా ఉండే ఆసక్తి, సృజనాత్మకత, ప్రశ్నించే తత్వాన్ని కాపాడాల్సిన బాధ్యత ఉపాధ్యాయులపై ఉందని అన్నారు. పిల్లల బాల్యాన్ని కాపాడుతూ.. వారిలో నేర్చుకోవాలనే ఆసక్తిని పెంచడం ముఖ్యమని సూచించారు.
విద్యార్థుల కలలను అర్థం చేసుకుని వాటిని సాకారం చేసుకునే దిశగా ప్రోత్సహించినప్పుడు ఉపాధ్యాయుడు నిజమైన మార్గదర్శిగా నిలుస్తారని ప్రధాని పేర్కొన్నారు. జాతీయ ఉపాధ్యాయ అవార్డు విజేతల కృషిని అభినందిస్తూ, దేశ భవిష్యత్తును తీర్చిదిద్దడంలో వారు చేస్తున్న సేవలకు కృతజ్ఞతలు తెలిపారు.
