విశాఖపట్నం: నగరంలో వినాయక చవితి వేడుకలను ప్రశాంతంగా, సురక్షిత వాతావరణంలో నిర్వహించేందుకు విశాఖపట్నం నగర పోలీస్ కమిషనర్ శంఖబ్రత బాగ్చి కీలక మార్గదర్శకాలు జారీ చేశారు. బహిరంగ ప్రదేశాల్లో వినాయక మండపాలు, విగ్రహాలను ఏర్పాటు చేసే నిర్వాహకులు తప్పనిసరిగా పోలీసుల అనుమతి తీసుకోవాలని స్పష్టం చేశారు. పండుగ సందర్భంగా ఎలాంటి అవాంఛనీయ ఘటనలు చోటుచేసుకోకుండా నిర్వాహకులు, ప్రజలు పోలీసులకు సహకరించాలని కోరారు.
మండపాల ఏర్పాటుకు అనుమతులు తీసుకునే ప్రక్రియను సులభతరం చేసేందుకు ‘ఏపీ పోలీస్ సేవా పోర్టల్’ ద్వారా సింగిల్ విండో విధానంలో ఆన్లైన్ దరఖాస్తు సౌకర్యాన్ని అందుబాటులోకి తీసుకొచ్చినట్లు అధికారులు తెలిపారు. దీంతో నిర్వాహకులు వివిధ శాఖల కార్యాలయాల చుట్టూ తిరగాల్సిన అవసరం లేకుండా ఒకే వేదిక ద్వారా అనుమతుల కోసం దరఖాస్తు చేసుకునే అవకాశం కల్పించారు.
పోలీస్ శాఖతో పాటు జీవీఎంసీ, అగ్నిమాపక శాఖ, కాలుష్య నియంత్రణ మండలి, విద్యుత్ శాఖలకు సంబంధించిన క్లియరెన్స్లను కూడా ఆన్లైన్ విధానంలో సమన్వయం చేసేలా చర్యలు తీసుకున్నట్లు తెలిపారు. మండప నిర్వాహకులు దరఖాస్తు సమయంలో ప్రతిపాదిత విగ్రహం ఎత్తు, విగ్రహం తయారీలో ఉపయోగించే పదార్థాలు, ఏర్పాటు చేయనున్న ప్రదేశం, భద్రతా ఏర్పాట్లు తదితర వివరాలను స్పష్టంగా పొందుపరచాలని సూచించారు.
వినాయక మండపాల వద్ద ప్రజా ప్రశాంతతకు ఎలాంటి విఘాతం కలగకుండా నిర్వాహకులు ముందస్తు జాగ్రత్తలు తీసుకోవాలని సీపీ సూచించారు. భక్తుల రాకపోకలకు అనుగుణంగా ట్రాఫిక్ నిర్వహణ, వాహనాల పార్కింగ్, విద్యుత్ సౌకర్యాలు, అగ్నిప్రమాదాల నివారణకు అవసరమైన చర్యలపై ప్రత్యేక దృష్టి పెట్టాలని అన్నారు.
దర్శనాలు లేదా చందాల పేరుతో ప్రజల నుంచి బలవంతంగా డబ్బులు వసూలు చేయడం తీవ్రమైన నేరమని పోలీస్ కమిషనర్ హెచ్చరించారు. ఇటువంటి ఘటనలపై ఫిర్యాదులు అందితే నిబంధనల ప్రకారం కఠిన చర్యలు తీసుకుంటామని స్పష్టం చేశారు. భక్తులకు స్వచ్ఛందంగా సౌకర్యాలు కల్పించాలి తప్ప.. ఎలాంటి బలవంతపు వసూళ్లకు పాల్పడకూడదని నిర్వాహకులకు సూచించారు.
భారీ విగ్రహాలు, పెద్ద ఎత్తున మండపాలు ఏర్పాటు చేసే నిర్వాహకులు అదనపు భద్రతా చర్యలు చేపట్టాలని అధికారులు సూచించారు. మండపాల వద్ద సీసీటీవీ కెమెరాలను ఏర్పాటు చేయడంతో పాటు రాత్రి వేళల్లో స్వచ్ఛంద సేవకులతో కాపలా ఏర్పాటు చేయాలని తెలిపారు. అనుమానాస్పద వ్యక్తులు లేదా వస్తువులు కనిపిస్తే వెంటనే పోలీసులకు సమాచారం అందించాలని సూచించారు.
పర్యావరణ పరిరక్షణకు ప్రాధాన్యత ఇవ్వాలని పోలీస్, యంత్రాంగం నిర్వాహకులకు సూచించింది. వీలైనంత వరకు మట్టి వినాయక విగ్రహాలను ఉపయోగించడాన్ని ప్రోత్సహించాలని కోరింది. పర్యావరణానికి హాని కలిగించే పదార్థాల వినియోగాన్ని తగ్గించాలని సూచించారు.
పండుగ ముగింపు సందర్భంగా నిర్వహించే నిమజ్జనం, శోభాయాత్రల సమయంలో శబ్ద కాలుష్యాన్ని నియంత్రించేందుకు కూడా కీలక నిబంధనలు విధించారు. అధిక శబ్దాలు చేసే డీజేలు, లౌడ్ స్పీకర్ల వినియోగంపై పూర్తి నిషేధం విధించినట్లు అధికారులు తెలిపారు. శోభాయాత్రలు, నిమజ్జన కార్యక్రమాలు ప్రశాంతంగా జరిగేలా నిర్వాహకులు పోలీసుల సూచనలు తప్పనిసరిగా పాటించాలని కోరారు.
వినాయక చవితి వేడుకలను భక్తిశ్రద్ధలతో, ప్రశాంత వాతావరణంలో నిర్వహించేందుకు ప్రజలు, మండప నిర్వాహకులు పోలీసులకు సహకరించాలని సీపీ శంఖబ్రత బాగ్చి విజ్ఞప్తి చేశారు. నిబంధనలను పాటిస్తూ పండుగను సురక్షితంగా నిర్వహించేందుకు ప్రతి ఒక్కరూ బాధ్యతగా వ్యవహరించాలని సూచించారు.
