తెలంగాణ రాజకీయాల్లో విమర్శలు, ప్రత్యారోపణలు మరింత ఉధృతంగా మారుతున్నాయి. రాష్ట్రంలో బీఆర్ఎస్ తన ఉనికిని కోల్పోయిందని, బీజేపీకి ప్రజల్లో స్థానం లేదని పీసీసీ అధ్యక్షుడు మహేశ్ కుమార్ గౌడ్ తీవ్ర వ్యాఖ్యలు చేశారు.ఇటీవల మీడియాతో మాట్లాడిన ఆయన, ప్రతిపక్షాలు ఎన్ని కుట్రలు పన్నినా ప్రజలు కాంగ్రెస్పైనే విశ్వాసం ఉంచుతున్నారని పేర్కొన్నారు. ఇటీవల జరిగిన ఎన్నికల ఫలితాలే ఇందుకు నిదర్శనమని ధీమా వ్యక్తం చేశారు. రాష్ట్రంలో కాంగ్రెస్ ప్రభుత్వంపై ప్రజలకు పూర్తి నమ్మకం ఉందని అన్నారు.
బీఆర్ఎస్ పరిస్థితిపై స్పందిస్తూ, ఆ పార్టీ పతనం ప్రారంభమైందని మహేశ్ గౌడ్ వ్యాఖ్యానించారు. ఎమ్మెల్సీ కల్వకుంట్ల కవిత వేరు దారి పట్టడంతో పార్టీ పరిస్థితి మరింత దెబ్బతిందని తెలిపారు. అలాగే కేటీఆర్ మరియు హరీశ్ రావు మధ్య ఆధిపత్య పోరు కొనసాగుతోందని, దీని వల్ల పార్టీలో అంతర్గత విభేదాలు తీవ్రస్థాయికి చేరుకున్నాయని ఆరోపించారు.మాజీ ముఖ్యమంత్రి కేసీఆర్ రాజకీయాలకు దూరమై తన ఫామ్హౌస్కే పరిమితమయ్యారని ఎద్దేవా చేశారు. దీంతో పార్టీ నాయకత్వంలో స్పష్టత లేకపోవడం బీఆర్ఎస్కు పెద్ద దెబ్బగా మారిందని అన్నారు.
బీజేపీపై కూడా మహేశ్ గౌడ్ విమర్శలు గుప్పించారు. ఎన్నికలు వచ్చినప్పుడల్లా ఆ పార్టీ దేవుడి పేరును ఉపయోగించి ఓట్లు అడుగుతోందని, ఈ విషయాన్ని ప్రజలు గమనిస్తున్నారని అన్నారు. అందుకే రాష్ట్రంలో బీజేపీకి ప్రజలు దూరంగా ఉంటున్నారని వ్యాఖ్యానించారు.ఇక కాంగ్రెస్ పార్టీ భవిష్యత్తుపై ధీమా వ్యక్తం చేస్తూ, ఇప్పటికిప్పుడు ఎన్నికలు జరిగినా కాంగ్రెస్ పార్టీ క్లీన్ స్వీప్ చేస్తుందని తెలిపారు. రాష్ట్రంలో 100 సీట్లకు పైగా గెలుస్తామని ఆయన జోస్యం చెప్పారు.
ప్రస్తుతం తెలంగాణలో కాంగ్రెస్, బీఆర్ఎస్, బీజేపీల మధ్య రాజకీయ పోటీ మరింత ఆసక్తికరంగా మారింది. పరస్పర విమర్శలతో రాజకీయ వాతావరణం వేడెక్కుతోంది. రాబోయే ఎన్నికలను దృష్టిలో పెట్టుకుని అన్ని పార్టీలు తమ వ్యూహాలను పదును పెడుతున్నాయి.
