IND vs SL : ఆంధ్రప్రదేశ్ క్రికెట్ అభిమానుల‌కు శుభ‌వార్త. టీమ్ఇండియా సీనియ‌ర్ ఆట‌గాళ్లు రోహిత్ శ‌ర్మ, విరాట్ కోహ్లీల‌ను ప్ర‌త్య‌క్షంగా చూసే సువ‌ర్ణావ‌కాశం వ‌చ్చింది. భారత్, శ్రీలంక జట్ల మధ్య డిసెంబర్ 13న జరగాల్సిన తొలి వన్డే మ్యాచ్ వేదిక మారింది. తొలుత ఈ మ్యాచ్ ఢిల్లీలోని అరుణ్‌ జైట్లీ స్టేడియంలో నిర్వహించాలని నిర్ణయించారు. అయితే.. ప్రతికూల వాతావరణ పరిస్థితులు తలెత్తే అవకాశం ఉండటంతో పాటు స్టేడియంలో పునరుద్ధరణ పనులు చేపట్టనున్న నేపథ్యంలో వేదికను విశాఖపట్నానికి మార్చారు. ఈ విష‌యాన్ని బీసీసీఐ వెల్లడించింది.
దేశ రాజధాని ఢిల్లీలో సాధారణంగా వాయు కాలుష్యం అధికంగా ఉంటుంది. దీనికి తోడు అరుణ్‌ జైట్లీ స్టేడియంలో ఔట్‌ఫీల్డ్‌ను కొత్తగా సిద్ధం చేసే పనులు జరుగుతున్నాయి. ఈ నేపథ్యంలో మ్యాచ్ నిర్వహణలో ఇబ్బందులు తలెత్తే అవకాశం ఉందని భావించిన ఢిల్లీ అండ్‌ డిస్ట్రిక్ట్‌ క్రికెట్ అసోసియేషన్‌ (DDCA) వేదికను మార్చాలని బీసీసీఐని కోరింది.
ఈ అభ్యర్థనను పరిశీలించిన బీసీసీఐ మ్యాచ్ వేదికను విశాఖపట్నానికి మారుస్తూ అధికారిక ప్రకటన విడుదల చేసింది. డిసెంబర్ 13న జరగనున్న తొలి వన్డే మ్యాచ్ విశాఖపట్నంలోని ACA-VDCA క్రికెట్ స్టేడియంలో నిర్వహించనున్నట్లు వెల్లడించింది. విశాఖ‌లో మ్యాచ్ జ‌ర‌గ‌నుంద‌నే వార్త తెలిసి ఆంధ్రప్రదేశ్ క్రికెట్ అభిమానులు పండ‌గ చేసుకుంటున్నారు.
విశాఖ వేదికగా రో-కోకు చివరి మ్యాచ్?
వైజాగ్ వేదికగా రోహిత్, కోహ్లీలకు ఇదే చివరి మ్యాచ్ అయ్యే అవకాశం ఉంది. అంతర్జాతీయ క్రికెట్‌లో టీ20లు, టెస్ట్‌ల‌కు వీరిద్దరు వీడ్కోలు ప‌లికిన సంగ‌తి తెలిసిందే. ప్ర‌స్తుతం ఈ ఇద్ద‌రూ వ‌న్డేలు మాత్ర‌మే ఆడుతున్నారు. 2027 వన్డే ప్రపంచకప్ ఆడటమే లక్ష్యంగా పెట్టుకున్నారు. కాగా.. వన్డే ప్రపంచకప్ 2027కు ద‌క్షిణాఫ్రికా, జింబాబ్వే, న‌మీబియాలు ఆతిథ్యం ఇస్తున్నాయి. ఇక 2027 వన్డే ప్రపంచకప్ తర్వాత రో-కో రిటైర్మెంట్ ప్ర‌క‌టించే అవకాశం ఉంది. దీంతో.. ఈ మెగా టోర్నీకి ముందు వైజాగ్ వేదికగా జరిగే ఏకైక వన్డే మ్యాచ్ కూడా ఇదే.
News
First ODI between India and Sri Lanka to be held on December 13 shifted from Delhi to Visakhapatnam
More details
| #TeamIndia | #INDvSL | @mflone_
https://t.co/P9wJkuYdtJ
— BCCI (@BCCI)
మూడు వ‌న్డేలు, మూడు టీ20 మ్యాచ్‌ల కోసం శ్రీలంక జ‌ట్టు భార‌త ప‌ర్య‌ట‌నకు రానుంది. తొలుత వన్డే, ఆ త‌రువాత టీ20 సిరీస్‌లు జ‌ర‌గ‌నున్నాయి. వన్డే సిరీస్ డిసెంబర్ 13 నుంచి టీ20 సిరీస్ డిసెంబర్ 22 నుంచి ప్రారంభం కానుంది.
