నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్లో తెరకెక్కిన మోస్ట్ అవైటెడ్ యాక్షన్ డ్రామా ‘ది ప్యారడైజ్’ సెప్టెంబర్ 24న ప్రపంచవ్యాప్తంగా ప్రేక్షకుల ముందుకు రానుంది. ‘దసరా’ తర్వాత ఈ కాంబినేషన్లో వస్తున్న రెండో సినిమా కావడంతో మొదటి నుంచే సినిమాపై భారీ అంచనాలు నెలకొన్నాయి. ఇప్పటివరకు విడుదలైన ప్రచార చిత్రాలు, దర్శకుడు, నటీనటులు వెల్లడించిన వివరాలను బట్టి చూస్తే.. ఈ సినిమా కేవలం యాక్షన్తో నిండిన కథ కాకుండా, బలమైన భావోద్వేగం, సామాజిక నేపథ్యం ఉన్న కథగా కనిపిస్తోంది.
అసలు ‘ది ప్యారడైజ్’ కథేంటి?
దర్శకుడు శ్రీకాంత్ ఓదెల వెల్లడించిన వివరాల ప్రకారం ‘ది ప్యారడైజ్’ కథకు తెలంగాణలో తాను చిన్నతనంలో చూసిన కొన్ని నిజ జీవిత ఘటనలు స్ఫూర్తిగా నిలిచాయి. అణచివేతకు గురైన ఓ సమాజం, వారి హక్కులు, గుర్తింపు, జీవన పోరాటం వంటి అంశాలను కథలో భాగంగా తీసుకున్నట్లు ఆయన తెలిపారు. ముఖ్యంగా ఈ కథలో తల్లి–కొడుకు అనుబంధం కీలకమైన భావోద్వేగ అంశంగా ఉంటుందని నాని కూడా వెల్లడించారు.సినిమా 1980ల నాటి సికింద్రాబాద్ నేపథ్యంతో సాగుతుందని ఇప్పటికే ప్రచారం జరుగుతోంది. ఈ నేపథ్యంలో ఆ కాలం నాటి సామాజిక పరిస్థితులు, అణచివేత, పోరాటం వంటి అంశాలు కథలో ఎలా ముడిపడ్డాయనేది ఆసక్తికరంగా మారింది.
‘జడల్’గా నాని.. తిరుగుబాటు దిశగా ప్రయాణం
నాని ఈ సినిమాలో ‘జడల్’ అనే విభిన్నమైన పాత్రలో కనిపిస్తున్నారు. సాధారణంగా నాని పోషించే పాత్రలకు భిన్నంగా జడల్ పాత్రను దర్శకుడు రూపొందించినట్లు నాని స్వయంగా తెలిపారు. ఈ పాత్ర సాధారణ సమాజంలో పెరిగిన వ్యక్తి కాదని, అతని రూపం, ప్రవర్తన, వ్యక్తిత్వం కథలో భాగమేనని చెప్పారు. జడల్కు ఉన్న ప్రత్యేకమైన జడలు, టాటూ, ముక్కెర, చైన్ వంటి అంశాలకు కూడా కథతో సంబంధం ఉందని నాని వెల్లడించారు.దర్శకుడి మాటలను బట్టి చూస్తే.. వ్యక్తిగత అనుభవాలు, తల్లి ప్రేమ, తన చుట్టూ ఉన్న సమాజం ఎదుర్కొంటున్న పరిస్థితులు జడల్ను ఒక తిరుగుబాటు దిశగా నడిపించే అంశాలుగా కనిపిస్తున్నాయి. అయితే జడల్ పాత్ర పూర్తి ప్రయాణం, అతని పోరాటం వెనుక అసలు కారణాలు సినిమా చూసిన తర్వాతే స్పష్టమవుతాయి.
‘షికంజా మాలిక్’గా..మోహన్బాబు
ఈ సినిమాలో సీనియర్ నటుడు మోహన్బాబు ‘షికంజా మాలిక్’ అనే ప్రతినాయక పాత్రలో కనిపిస్తున్నారు. దర్శకుడు శ్రీకాంత్ ఓదెల ఈ పాత్రను కథలో అత్యంత కీలకమైన పాత్రగా తీర్చిదిద్దినట్లు చిత్రబృందం వెల్లడించింది. మోహన్బాబు పాత్ర నాని పాత్రతో ఎదురుపడే సన్నివేశాలు సినిమాలో కీలకంగా ఉండనున్నట్లు దర్శకుడు తెలిపారు.అదే సమయంలో రాఘవ్ జుయాల్ కూడా సినిమాలో కీలకమైన ప్రతినాయక పాత్రలో కనిపిస్తున్నారు. సెప్టెంబర్ 24న విడుదల కానున్న ఈ చిత్రంలో రాఘవ్ జుయాల్ తెలుగు తెరకు పరిచయం అవుతున్నారు.
రాజకీయ నేపథ్యంపై వస్తున్న చర్చ
‘ది ప్యారడైజ్’ ప్రమోషనల్ కంటెంట్ బయటకు వచ్చినప్పటి నుంచి సినిమాలోని కొన్ని పాత్రలను తెలంగాణ రాజకీయ నాయకులతో పోలుస్తూ సోషల్ మీడియాలో చర్చ జరుగుతోంది. ముఖ్యంగా ‘షికంజా మాలిక్’, ‘విక్రమ్ మాలిక్’ పాత్రలు వాస్తవ రాజకీయ వ్యక్తులను పోలి ఉన్నాయనే ఊహాగానాలు వినిపిస్తున్నాయి. అలాగే జడల్ పాత్రను ఇటీవలి తెలంగాణ రాజకీయ పరిణామాలకు అన్వయిస్తూ కొందరు నెటిజన్లు తమ అభిప్రాయాలను వ్యక్తం చేస్తున్నారు.అయితే ఈ పాత్రలు నిర్దిష్టంగా ఏ రాజకీయ నాయకుడినైనా ఉద్దేశించి రూపొందించబడ్డాయని చిత్రబృందం అధికారికంగా ప్రకటించలేదు. అందువల్ల ప్రస్తుతం సోషల్ మీడియాలో జరుగుతున్న ఈ పోలికలను ఊహాగానాలుగానే చూడాల్సి ఉంటుంది. మరోవైపు దర్శకుడు శ్రీకాంత్ ఓదెల మాత్రం సినిమాలోని కొన్ని అంశాలకు తెలంగాణలో తాను చూసిన వాస్తవ ఘటనలు స్ఫూర్తిగా నిలిచాయని చెప్పారు.
‘ఆయా షేర్’తో పెరిగిన ఆసక్తి
సినిమా ప్రమోషన్లలో విడుదలైన ‘ఆయా షేర్’ పాట కూడా ప్రేక్షకుల్లో ఆసక్తిని పెంచింది. నాని పాత్రకు ఇచ్చిన ఎలివేషన్, పాటలోని మాస్ ట్రీట్మెంట్ సోషల్ మీడియాలో చర్చకు దారితీసింది. మరోవైపు ‘యేశనగుల’ పాటకు తెలంగాణ జానపద ప్రభావం ఉండటంతో సినిమా నేపథ్యంపై మరింత ఆసక్తి ఏర్పడింది.
యాక్షన్ కంటే ఎమోషన్ కీలకం?
‘ది ప్యారడైజ్’ను పూర్తిగా యాక్షన్ సినిమాగా భావించవద్దని దర్శకుడు శ్రీకాంత్ ఓదెల, హీరో నాని ఇప్పటికే పలు సందర్భాల్లో స్పష్టం చేశారు. తల్లి–కొడుకు భావోద్వేగం, అణగారిన సమాజం కథ సినిమాకు ప్రధానమైన భావోద్వేగ పునాది అని వారు తెలిపారు. నాని కూడా ఈ సినిమా తన కెరీర్లో శారీరకంగా, మానసికంగా అత్యంత సవాలుగా నిలిచిన చిత్రాల్లో ఒకటని చెప్పారు.
మొత్తంగా చూస్తే.. జడల్ ఎవరు? అతని పోరాటం ఎక్కడ మొదలవుతుంది? షికంజా మాలిక్తో అతనికి ఉన్న సంబంధం ఏమిటి? తల్లి–కొడుకు అనుబంధం కథను ఎలా మలుపు తిప్పుతుంది? అనే ప్రశ్నలకు సమాధానాలు సినిమా విడుదలైన తర్వాతే పూర్తిగా తెలుస్తాయి. సెప్టెంబర్ 24న థియేటర్లలోకి రానున్న ‘ది ప్యారడైజ్’ ప్రేక్షకులకు ఎలాంటి అనుభూతిని అందిస్తుందో చూడాలి.
