తెలంగాణ ఆర్టీసీ కార్మికుడు శంకర్ గౌడ్ మృతి ఘటనపై బిఆర్ఎస్ పార్టీ సీనియర్ నేత, మాజీ మంత్రి హరీశ్ రావు ఆవేదన వ్యక్తం చేశారు. సంస్థను కాపాడేందుకు, కార్మికుల హక్కుల కోసం ప్రాణత్యాగం చేసిన శంకర్ గౌడ్కు ఘన నివాళులు అర్పిస్తూ, ఆయన కుటుంబానికి సానుభూతి తెలిపారు.
ఈ సందర్భంగా హరీశ్ రావు మాట్లాడుతూ, హక్కుల సాధన కోసం కార్మికులు సంఘటితంగా పోరాడాలని, కానీ ఇలాంటి ఆత్మబలిదానాలకు ఎవరూ ఒడిగట్టవద్దని హృదయపూర్వకంగా విజ్ఞప్తి చేశారు. సమస్యల పరిష్కారం కోసం ప్రాణత్యాగం చేయడం సరైన మార్గం కాదని, చట్టపరమైన, ప్రజాస్వామ్య మార్గాల్లో పోరాటం కొనసాగించాలని సూచించారు.
శంకర్ గౌడ్ మృతికి ప్రధాన కారణం రాష్ట్ర ప్రభుత్వమేనని ఆయన ఆరోపించారు. ముఖ్యమంత్రి రేవంత్ రెడ్డిపై తీవ్ర విమర్శలు గుప్పించిన హరీశ్ రావు, ప్రభుత్వ అలసత్వం, నిర్లక్ష్యం వల్లే శంకర్ గౌడ్ మృతి చెందాడని. ఆర్టీసీ విలీనంపై ప్రభుత్వం ఇచ్చిన హామీలను అమలు చేయడంలో విఫలమవడం కార్మికుల్లో తీవ్ర అసంతృప్తిని కలిగించిందన్నారు.
అధికారంలోకి రాగానే ఆర్టీసీని ప్రభుత్వంలో విలీనం చేస్తామని, కార్మికుల అన్ని సమస్యలను పరిష్కరిస్తామని చెప్పిన ప్రభుత్వం ఇప్పుడు మాట తప్పిందని విమర్శించారు. ఎన్నికల సమయంలో ఇచ్చిన హామీలను నిలబెట్టుకోకుండా కాలం గడుపుతున్నారని ఆయన మండిపడ్డారు. “మేనిఫెస్టోలో ఇచ్చిన వాగ్దానాలను ఇంకా ఎన్ని రోజులు అమలు చేయకుండా వాయిదా వేస్తారు? ఇలా ఇంకెంతమందిని బలి తీసుకుంటారు?” అంటూ ఆయన ప్రశ్నించారు.
శంకర్ గౌడ్ మృతి కార్మిక వర్గానికి తీరని లోటని హరీశ్ రావు అభిప్రాయపడ్డారు. ఇలాంటి ఘటనలు పునరావృతం కాకుండా ప్రభుత్వం వెంటనే చర్యలు తీసుకోవాలని ఆయన డిమాండ్ చేశారు. ముఖ్యంగా ఆర్టీసీ కార్మికుల న్యాయమైన డిమాండ్లను పరిగణలోకి తీసుకొని, సమస్యల పరిష్కారానికి తక్షణ చర్యలు ప్రారంభించాలని ప్రభుత్వానికి సూచించారు.
ఇకపై కార్మికుల్లో నమ్మకం పెంచేందుకు ప్రభుత్వం స్పష్టమైన కార్యాచరణ ప్రణాళికను ప్రకటించాలని కూడా ఆయన కోరారు. కార్మికుల సంక్షేమం పట్ల ప్రభుత్వం బాధ్యతాయుతంగా వ్యవహరించాల్సిన అవసరం ఉందని పేర్కొన్నారు.
