ఆర్టిఫిషియల్ ఇంటెలిజెన్స్ (AI) ఇప్పుడు మన రోజువారీ జీవితంలో భాగంగా మారిపోయింది. ఆఫీస్ పనులు, చదువులు, కంటెంట్ క్రియేషన్, సమాచార సేకరణ నుంచి రోజువారీ అవసరాల వరకు చాలామంది AI టూల్స్ను ఉపయోగిస్తున్నారు. వీటిలో ChatGPTకు ప్రపంచవ్యాప్తంగా భారీ ఆదరణ ఉంది. అయితే ChatGPT వినియోగదారులకు సంబంధించిన ఓ కీలక మార్పు ఇప్పటికే అమల్లోకి వచ్చింది. ఫ్రీ, Go ప్లాన్లలో ఉన్న కొంతమంది యూజర్లకు ChatGPT సమాధానాల కింద Sponsored Ads కనిపించే విధానం ప్రారంభమైంది.
OpenAI ప్రకారం ChatGPT Adsను 2026 ఫిబ్రవరిలో అమెరికాలో పరీక్షించడం ప్రారంభించింది. ఆ తర్వాత క్రమంగా ఇతర మార్కెట్లకు విస్తరించింది. తాజాగా భారత్తో పాటు యూరప్, మిడిల్ ఈస్ట్, నార్త్ ఆఫ్రికా ప్రాంతాల్లో కూడా అడ్వర్టైజర్లకు ChatGPT Ads ప్లాట్ఫామ్ అందుబాటులోకి వచ్చింది.
అందరికీ Ads కనిపిస్తాయా?
ప్రస్తుతం Free, Go ప్లాన్లలో ఉన్న యూజర్లకు Ads కనిపించే అవకాశం ఉంది. అయితే ప్రతి ప్రశ్నకు తప్పనిసరిగా ప్రకటన వస్తుందని కాదు. ChatGPT సమాధానం పూర్తయిన తర్వాత దాని కింద Sponsored అని స్పష్టంగా గుర్తించిన ప్రకటన కనిపించవచ్చు. ప్రకటనలు ChatGPT సమాధానాల నుంచి వేరుగా, ప్రత్యేకంగా చూపిస్తామని OpenAI చెబుతోంది.
అయితే Plus, Pro, Business, Enterprise, Edu వంటి ప్లాన్లలో Ads ఉండవని OpenAI స్పష్టం చేసింది. అలాగే 18 ఏళ్లలోపు వారిగా గుర్తించిన ఖాతాలకు కూడా Ads చూపించరు.
ఉదాహరణకు ఒక యూజర్ ఏదైనా ప్రొడక్ట్, సర్వీస్ లేదా కొనుగోలుకు సంబంధించిన సమాచారం ChatGPTలో వెతుకుతున్నప్పుడు.. ఆ సంభాషణ సందర్భానికి అనుగుణంగా సంబంధిత Sponsored Ad కనిపించే అవకాశం ఉంటుంది. Adsను ఏ ప్రకటన చూపించాలి అనే నిర్ణయం ప్రత్యేకమైన Ads సిస్టమ్ ద్వారా తీసుకుంటుంది.
కంపెనీలు ChatGPTలో Ads ఎలా ఇస్తాయి?
OpenAI ఇప్పటికే ChatGPT Ads Managerను అందుబాటులోకి తీసుకొచ్చింది. కంపెనీలు తమ ఉత్పత్తులు, సేవలను ChatGPTలో ప్రమోట్ చేసుకునేందుకు ఈ ప్లాట్ఫామ్ను ఉపయోగించవచ్చు. ప్రస్తుతం Ads కోసం CPM, CPC వంటి కొనుగోలు విధానాలు అందుబాటులో ఉన్నాయి. CPC క్యాంపెయిన్లకు OpenAI ప్రారంభ బిడ్గా క్లిక్కు సుమారు 3–5 డాలర్లను సిఫారసు చేస్తోంది. అయితే ఇది తప్పనిసరి స్థిర ధర కాదు; బిడ్డింగ్, క్యాంపెయిన్ లక్ష్యాలు, మార్కెట్ తదితర అంశాల ఆధారంగా ధరలు మారవచ్చు.
అందువల్ల సోషల్ మీడియాలో ప్రచారంలో ఉన్నట్లుగా రోజుకు రూ.725 మాత్రమే ప్రారంభ ఖర్చు అనే నిర్దిష్ట మొత్తాన్ని అధికారిక ChatGPT Ads ధరగా చెప్పడం సరైనది కాదు. OpenAI ప్రస్తుత అధికారిక సమాచారం ప్రకారం CPC, CPM ఆధారిత బిడ్డింగ్ విధానాలు ఉన్నాయి.
మీ వ్యక్తిగత చాట్స్ను కంపెనీలు చదవగలవా?
ChatGPT Adsపై యూజర్లలో ఎక్కువగా వస్తున్న ప్రశ్న ఇదే. దీనిపై OpenAI స్పష్టమైన సమాధానం ఇచ్చింది. అడ్వర్టైజర్లకు యూజర్ల వ్యక్తిగత ChatGPT సంభాషణలు, Chat History, Memories లేదా వ్యక్తిగత వివరాలకు యాక్సెస్ ఉండదు. OpenAI ప్రకారం అడ్వర్టైజర్లకు ప్రధానంగా వారి Ads ఎన్ని సార్లు చూశారు, ఎన్ని క్లిక్స్ వచ్చాయి వంటి aggregated, non-identifying performance data మాత్రమే అందుతుంది.
అయితే Adsను మరింత relevantగా చూపించేందుకు ChatGPTలోని Ads వ్యవస్థ ప్రస్తుత చాట్ సందర్భం వంటి కొన్ని సిగ్నల్స్ను ఉపయోగించవచ్చు. Personalized Ads ఆన్లో ఉంటే, కొన్ని సందర్భాల్లో గత చాట్స్, మెమరీ వంటి సమాచారాన్ని కూడా ప్రకటన ఎంపికకు ఉపయోగించవచ్చని OpenAI చెబుతోంది. అయితే ఈ సమాచారం అడ్వర్టైజర్లకు నేరుగా ఇవ్వబడదు.
Ads వల్ల ChatGPT సమాధానాలు మారుతాయా?
OpenAI ప్రకారం Ads ChatGPT సమాధానాలను ప్రభావితం చేయవు. ప్రకటనల వ్యవస్థ, ChatGPT సమాధానాలు ఇచ్చే మోడల్ వేర్వేరు వ్యవస్థలుగా పనిచేస్తాయి. అడ్వర్టైజర్లు ChatGPT ఇచ్చే సమాధానాలను మార్చడం, ర్యాంక్ చేయడం లేదా ప్రభావితం చేయడం సాధ్యం కాదని సంస్థ స్పష్టం చేసింది.
అంతేకాదు, రాజకీయ అంశాలు, వ్యక్తిగత ఆరోగ్యం వంటి సున్నితమైన సందర్భాల్లో Ads చూపించకుండా ప్రత్యేక నియమాలను OpenAI అమలు చేస్తోంది. ప్రస్తుతం ChatGPTలో రాజకీయ ప్రకటనలను అనుమతించడం లేదని Ads Policyలో పేర్కొంది.
