ఒక ముద్ద అన్నం కోసం మనిషి ప్రయాస.. ‘నీవెక్కడ..?’ రేపే లఘుచిత్రం ప్రివ్యూ షో

మానవ జీవితం మొత్తం ఒక ముద్ద అన్నం కోసం చేసే ప్రయాస చుట్టూనే తిరుగుతుందనే భావనను ప్రతిబింబించేలా ‘నీవెక్కడ..?’ అనే లఘుచిత్రం తెరకెక్కుతోంది. నేటి జీవనశైలిలో ఆకలి తీర్చుకునే క్రమంలో మనిషి ఎదుర్కొంటున్న సంఘర్షణ, ఆ ప్రయాణంలో కోల్పోతున్న బంధాలు, వ్యక్తిత్వం వంటి అంశాలను కథాంశంగా తీసుకుని ఈ చిత్రాన్ని రూపొందిస్తున్నట్లు దర్శకుడు దాసరి రవికుమార్ తెలిపారు.RV STUDIOS & TEJUFILMS సంయుక్తంగా ఈ లఘుచిత్రాన్ని నిర్మిస్తున్నాయి. చిత్ర ప్రివ్యూ షోను ఈ నెల 18వ తేదీన నిర్వహించనున్నట్లు దర్శకుడు వెల్లడించారు. లఘుచిత్ర నిర్మాణం పూర్తిగా గన్నవరం పరిసర ప్రాంతాల్లో జరిగినట్లు తెలిపారు. చిత్రాన్ని వివిధ లఘుచిత్ర పోటీలకు పంపేందుకు సిద్ధం చేస్తున్నామని పేర్కొన్నారు.

ఆకలి చుట్టూ తిరిగే జీవన సంఘర్షణ

‘నీవెక్కడ..?’ కథలో మానవ జీవనశైలిలోని ఒక ముఖ్యమైన కోణాన్ని చూపించే ప్రయత్నం చేసినట్లు దర్శకుడు తెలిపారు. జీవనం సాగించేందుకు, కడుపు నింపుకునేందుకు మనిషి చేసే నిరంతర ప్రయాసలో ఎన్నో సందర్భాల్లో కుటుంబ బంధాలు, మానవ సంబంధాలు, వ్యక్తిత్వ విలువలు వెనుకబడుతున్నాయనే ఆలోచనను కథ ద్వారా చెప్పే ప్రయత్నం చేసినట్లు వివరించారు.సమాజంలో మారుతున్న జీవన విధానం, మనిషి ప్రాధాన్యతల్లో వస్తున్న మార్పులు, అవసరాల కోసం చేసే పోరాటం వంటి అంశాలను లఘుచిత్రం ద్వారా ప్రేక్షకుల ముందుకు తీసుకురానున్నట్లు చిత్ర బృందం తెలిపింది.

సీనియర్ నటులతో పాటు బాలనటులు

ఈ లఘుచిత్రంలో సీనియర్ నటులు కొండపల్లి అప్పారావు, ఎన్. భాను, సుధాకరరెడ్డి ముఖ్య పాత్రల్లో నటిస్తున్నారు. కథకు అనుగుణంగా పలు వయసుల పాత్రలను ఇందులో చూపిస్తున్నట్లు చిత్ర బృందం తెలిపింది.అలాగే రాక్ రాజేష్ అకాడమీకి చెందిన బాలనటులు అజేయ్, నిశాంత్, జాహ్నవి, పర్నిత కూడా ఈ చిత్రంలో నటిస్తున్నారు. వీరితో పాటు రాక్ రాజేష్, ఉష, రాంబాబు, అన్నపూర్ణ, సురేష్, ద్రోణాదేవి, గోపికాసుభాషిణి తదితరులు ఇతర పాత్రల్లో కనిపించనున్నారు.

అన్ని బాధ్యతలు దర్శకుడివే

‘నీవెక్కడ..?’ లఘుచిత్రానికి నెమలికంటి లక్ష్మిదేవి నిర్మాతగా వ్యవహరిస్తున్నారు. సుధాకరరెడ్డి. టి రైటర్, స్క్రీన్‌ప్లే బాధ్యతలు నిర్వహించారు. సంగీత విభాగంలో ఫ్లూట్‌ను మల్లికార్జునరావు అందించగా, కీబోర్డ్ ప్లేయర్‌గా మనోరంజన్ (పెద్దన్న) పనిచేశారు.చిత్ర టైటిల్స్‌ను శ్రీరామ్ రూపొందించగా, పీఆర్‌ఓగా ఎస్.ఏ.టి. శ్రీధర్ వ్యవహరిస్తున్నారు.ఈ లఘుచిత్రానికి కథ, కెమెరా, ఎడిటింగ్, సంగీతంతో పాటు దర్శకత్వ బాధ్యతలను కూడా దాసరి రవికుమార్ స్వయంగా నిర్వహిస్తున్నట్లు తెలిపారు. గన్నవరం పరిసర ప్రాంతాల్లో చిత్రీకరణ పూర్తి చేసుకున్న ‘నీవెక్కడ..?’ ప్రస్తుతం ప్రివ్యూ ప్రదర్శనకు సిద్ధమవుతోంది. అనంతరం వివిధ లఘుచిత్ర పోటీలకు పంపేందుకు చిత్ర బృందం సన్నాహాలు చేస్తోంది.