తెలంగాణ ప్రజలకు బ్యాడ్ న్యూస్.. చేయూత పెన్షన్లు, ఇందిరమ్మ చీరల పంపిణీ వాయిదా.. అధికారిక ఆదేశాలు జారీ!

Must read

Telangana Government: తెలంగాణ రాష్ట్రవ్యాప్తంగా మాజీ ప్రధాని ఇందిరాగాంధీ జయంతిని పురస్కరించుకుని గురువారం (నవంబర్ 19న) అత్యంత ప్రతిష్ఠాత్మకంగా జరగాల్సిన ఇందిరమ్మ చీరల పంపిణీ, నూతన చేయూత పెన్షన్ల నిధుల జమ కార్యక్రమాన్ని రాష్ట్ర ప్రభుత్వం తాత్కాలికంగా వాయిదా వేసింది. ముందుగా నిర్ణయించిన షెడ్యూల్ ప్రకారం సిద్దిపేట వేదికగా ముఖ్యమంత్రి రేవంత్ రెడ్డి చేతుల మీదుగా ఈ రెండు కీలక సంక్షేమ కార్యక్రమాలు ప్రారంభం కావాల్సి ఉంది. అయితే, మహిళలకు సంబంధించిన ఈ భారీ కార్యక్రమాలను ఇతర సభలతో కాకుండా పూర్తిగా విడిగా, మరింత ఘనంగా నిర్వహించాలని సర్కార్ ఉన్నత స్థాయిలో నిర్ణయించింది. ఈ మేరకు బుధవారం అధికారిక ఆదేశాలు జారీ చేస్తూ, ఈ కార్యక్రమాన్ని ఈ నెల 26వ తేదీకి మారుస్తున్నట్లు ప్రభుత్వం(Telangana Government) స్పష్టం చేసింది.

రాజ్యాంగ దినోత్సవం వేళ కోటి మంది మహిళలకు ప్రత్యేకంగా చిలకపచ్చ చీరలు:

ఈ నెల 26వ తేదీన రాష్ట్ర ప్రభుత్వం అధికారికంగా నిర్వహించనున్న భారత రాజ్యాంగ దినోత్సవం సందర్భంగా ఈ భారీ సంక్షేమ పథకాలకు శ్రీకారం చుట్టనుంది. ఈ క్రమంలో రాష్ట్రంలోని అర్హులైన కోటి మంది ఆడపడుచులకు ప్రభుత్వం ప్రత్యేకంగా తయారు చేయించిన చిలకపచ్చ రంగు ఇందిరమ్మ చీరలను కానుకగా పంపిణీ చేయనుంది. దీనితో పాటు రాష్ట్రవ్యాప్తంగా కొత్తగా ఎంపికైన 4,63,857 మంది లబ్ధిదారుల బ్యాంకు ఖాతాల్లో చేయూత సామాజిక భద్రతా పెన్షన్ల నిధులను నేరుగా జమ చేసే ప్రక్రియను కూడా ఆరోజే ముఖ్యమంత్రి ప్రారంభించనున్నారు.

ఏర్పాట్లపై మంత్రి సీతక్క ఆదేశాలు.. ఇప్పటికే జిల్లాలకు చేరిన చీరల నిల్వలు:

నవంబర్ 26న జరగనున్న ఈ కార్యక్రమం విజయవంతానికి ఎక్కడా లోటుపాట్లు లేకుండా పకడ్బందీ ఏర్పాట్లు చేయాలని పంచాయతీరాజ్, గ్రామీణాభివృద్ధి శాఖ మంత్రి సీతక్క పేదరిక నిర్మూలన సంస్థ (సెర్ప్‌) సీఈవో దివ్యా దేవరాజన్‌కు స్పష్టమైన ఆదేశాలు జారీ చేశారు. ఇప్పటికే రాష్ట్రవ్యాప్తంగా అన్ని జిల్లాల గోదాములకు చిలకపచ్చ చీరల నిల్వలు పూర్తిస్థాయిలో చేరుకోగా, క్షేత్రస్థాయిలో లబ్ధిదారులకు నూతన పెన్షన్ మంజూరు పత్రాల పంపిణీ ప్రక్రియ కూడా విజయవంతంగా పూర్తయినట్లు అధికారులు వెల్లడించారు.

- Advertisement -spot_img

More articles

spot_img

Latest article

error: Content is protected !!