IRDAI New Rules: వాహనదారులకు బీమా పరంగా మరింత స్పష్టత, ఆర్థిక వెసులుబాటు కల్పించే దిశగా భారత బీమా నియంత్రణ, అభివృద్ధి ప్రాధికార సంస్థ (IRDAI New Rules) కీలక అడుగులు వేస్తోంది. 2026 డిసెంబర్ 15 నుంచి దేశవ్యాప్తంగా కొత్త ‘4-లేయర్ మోటార్ ఇన్సూరెన్స్’ విధానం అమల్లోకి రానున్నట్లు తెలుస్తోంది. ఇకపై మోటార్ ఇన్సూరెన్స్ తీసుకునే విధానాన్ని నాలుగు వేర్వేరు విభాగాలుగా వర్గీకరించనుండగా, వినియోగదారులు తమకు నిజంగా అవసరమైన కవరేజీని మాత్రమే ఎంచుకుని ప్రీమియం భారాన్ని తగ్గించుకునే వెసులుబాటును ఈ కొత్త నిబంధనలు కల్పిస్తున్నాయి.
నాలుగు విభాగాలుగా బీమా వర్గీకరణ.. ఏది తప్పనిసరి? ఏది ఐచ్ఛికం?
నూతన నిబంధనల ప్రకారం మోటార్ ఇన్సూరెన్స్ పాలసీలు నాలుగు విభాగాలుగా విభజితమవుతాయి. ఇందులో మొదటిది థర్డ్ పార్టీ ఇన్సూరెన్స్ కాగా, రెండోది యజమాని పర్సనల్ యాక్సిడెంట్ కవరేజీ. ఈ రెండూ చట్టపరంగా తప్పనిసరిగా కొనసాగుతాయి. కాగా మూడో విభాగమైన ప్రయాణికులు/పిలియన్ రైడర్ల చట్టపరమైన బాధ్యత కవరేజీ, నాలుగో విభాగమైన ఓన్ డ్యామేజ్ కవర్లను ఐచ్ఛికంగా మార్చారు. అంటే వాహనదారులు తమ అవసరానికి అనుగుణంగానే ఈ అదనపు కవర్లను ఎంచుకునే అవకాశం ఉంటుంది.
విడివిడిగా ప్రీమియం ధరలు.. కస్టమర్ ఆప్షన్ ఫారమ్ తప్పనిసరి:
కొత్త విధానంలో పారదర్శకతకు ఇన్సూరెన్స్ సంస్థలు అధిక ప్రాధాన్యత ఇవ్వాల్సి ఉంటుంది. పాలసీ పరిధిలోని ప్రతి కవరేజీకి అయ్యే ప్రీమియం వివరాలను విడివిడిగా వెల్లడించాల్సి ఉంటుంది. అంతేకాకుండా, బీమా కొనుగోలు సమయంలో ‘కస్టమర్ ఆప్షన్ ఫారమ్’ను అందించడం తప్పనిసరి కానుంది. దీనిద్వారా ఆన్‌లైన్ లేదా ఆఫ్‌లైన్ విధానంలో తమకు అవసరమైన కవర్లను మాత్రమే టిక్ చేసి ఎంచుకునే వీలుంది. దీనివల్ల నిరుపయోగమైన లేదా అనవసర కవర్ల కోసం అదనపు ప్రీమియం చెల్లించే అవసరం వాహనదారులకు ఉండదు.
ప్రయాణికుల కవరేజీలో మార్పులు.. పాలసీదారులు తెలుసుకోవాల్సిన విషయాలు:
ఈ కొత్త మార్పుల ద్వారా ప్రయాణికులు, బైక్‌పై వెనుక కూర్చునే వ్యక్తుల రక్షణకు ప్రత్యేక కవరేజీ ఆప్షన్ అందుబాటులోకి రానుంది. అయితే వాహన యజమానితో పాటు వారి కుటుంబ సభ్యులు (తల్లిదండ్రులు, భార్య/భర్త, పిల్లలు) ఈ ప్రయాణికుల కవరేజీ మినహాయింపుల పరిధిలోకి వస్తారు. డిసెంబర్ 15 నుంచి అమల్లోకి రానున్న ఈ విధానం వల్ల ఖర్చులపై సంపూర్ణ నియంత్రణ లభించినప్పటికీ, ప్రమాద సమయాల్లో ఇబ్బందులు పడకుండా ఉండేందుకు పాలసీ తీసుకునే సమయంలో తప్పనిసరి, ఐచ్ఛిక నిబంధనలను క్షుణ్ణంగా పరిశీలించడం శ్రేయస్కరం.
