LPG Cylinder Price Hike; హోటళ్ళు, రెస్టారెంట్లు, ఇతర వ్యాపార సంస్థలు వినియోగించే వాణిజ్య ఎల్‌పీజీ గ్యాస్ సిలిండర్(LPG Cylinder Price Hike) ధర మళ్లీ స్వల్పంగా పెరిగింది. చమురు మార్కెటింగ్ కంపెనీలు వాణిజ్య సిలిండర్ ధరపై రూ.10 పెంచుతూ నిర్ణయం తీసుకున్నాయి. ఈ తాజా ధరల పెంపు నేటి నుంచే తక్షణమే అమలులోకి రానుంది. కాగా, పండగల సీజన్‌లోనే మళ్లీ వాణిజ్య సిలిండర్ ధరలు పెరగడం చిన్న వ్యాపారులకు మరియు ఆహార రంగానికి అదనపు ఆర్థిక భారంగా మారింది.
న్యూ ఢిల్లీలో రూ.2,820కి చేరిన ధర.. గృహ వినియోగ గ్యాస్ సిలిండర్లలో ఎలాంటి మార్పు లేదు:
ధరల పెంపుతో దేశ రాజధాని ఢిల్లీతో పాటు ప్రధాన నగరాల్లో 19 కేజీల వాణిజ్య ఎల్‌పీజీ సిలిండర్ ధర రూ.2,820కి చేరింది. గత కొన్ని నెలలుగా వాణిజ్య సిలిండర్ ధరలు క్రమంగా పెరుగుతూ వస్తుండగా, గృహావసరాలకు వినియోగించే 14.2 కేజీల ఎల్‌పీజీ సిలిండర్ ధరల్లో మాత్రం ఎలాంటి మార్పు లేకపోవడం సామాన్య గృహిణులకు కొంత ఊరటనిచ్చే అంశం. అయితే హోటళ్లు, కేటరింగ్ రంగాలు మాత్రం ఈ పెంపుతో నిర్వహణ వ్యయం పెరుగుతుందని ఆందోళన వ్యక్తం చేస్తున్నాయి.
పశ్చిమాసియా ఉద్రిక్తతలు, ముడిచమురు సంక్షోభం.. ధరలు పెరగడానికి ప్రధాన కారణాలు:
గ్లోబల్ మార్కెట్‌లో పశ్చిమాసియా ప్రాంతంలో నెలకొన్న తీవ్ర ఉద్రిక్తతలు, సౌదీ అరేబియాలోని కీలక చమురు క్షేత్రాలపై కొనసాగుతున్న దాడుల కారణంగా అంతర్జాతీయంగా ఇంధన సరఫరాపై ప్రభావం పడింది. దీనివల్ల క్రూడ్ ఆయిల్, గ్యాస్ రేట్లు పెరగడంతో చమురు సంస్థలు వాణిజ్య సిలిండర్లపై భారం మోపాల్సి వచ్చింది. అంతర్జాతీయ పరిణామాలు అనుకూలించకపోతే రాబోయే రోజుల్లో ధరలపై మరింత ఒత్తిడి ఉండే అవకాశం ఉందని నిపుణులు అంచనా వేస్తున్నారు.
