Cyclone Arnab: అర్నబ్ తుపాను (Cyclone Arnab) తీవ్రతతో కాకినాడ జిల్లా ఉప్పాడ తీరంలో సముద్రం అత్యంత అల్లకల్లోలంగా మారింది. అలలు ఉవ్వెత్తున ఎగసిపడుతుండటంతో ప్రసిద్ధ ఉప్పాడ బీచ్ రోడ్డు తీవ్రంగా కోతకు గురైంది. ఈదురుగాలుల ధాటికి తీరంలో అమర్చిన రక్షణ బండరాళ్లు సైతం కొట్టుకుపోయాయి. యానాం సమీపంలో ‘అర్నబ్’ తుపాను ల్యాండ్‌ఫాల్ ప్రక్రియ అధికారికంగా ప్రారంభమైంది. తుపాను తీరాన్ని తాకిన విషయాన్ని అధికారులు ముఖ్యమంత్రి నారా చంద్రబాబు నాయుడుకు వివరించారు. ఉదయం 4 గంటలకే తీరం దాటుతుందని భావించినప్పటికీ, ల్యాండ్‌ఫాల్ ప్రక్రియ పూర్తి కావడానికి మరో రెండు గంటల సమయం పడుతుందని వాతావరణ శాఖ తెలిపింది.
రంగంలోకి సీఎం చంద్రబాబు.. జిల్లా యంత్రాంగంతో ఎప్పటికప్పుడు సమీక్ష:
తీవ్ర తుపాను గమనం, దాని ప్రభావంపై ముఖ్యమంత్రి చంద్రబాబు నాయుడు సచివాలయం నుంచి ఎప్పటికప్పుడు ఆరా తీస్తున్నారు. తీర ప్రాంత జిల్లాల కలెక్టర్లు, పోలీసు అధికారులతో నిరంతరం మాట్లాడుతున్న సీఎం, ప్రజా నష్టం జరగకుండా చర్యలు వేగవంతం చేయాలని ఆదేశించారు. జిల్లా వ్యాప్తంగా ఈదురుగాలులతో కూడిన భారీ వర్షాలు కురుస్తుండటంతో సహాయక బృందాలను సిద్ధంగా ఉంచారు.
ల్యాండ్‌ఫాల్ తర్వాత కూడా వర్ష ముప్పు.. తీరప్రాంత ప్రజలు అప్రమత్తంగా ఉండాలని హెచ్చరిక:
తుపాను ల్యాండ్‌ఫాల్ ప్రక్రియ పూర్తయినప్పటికీ వర్షాలు, బలమైన ఈదురుగాలులు తీవ్రంగా కొనసాగుతాయని అధికారులు స్పష్టం చేశారు. గాలుల ధాటికి విద్యుత్ స్తంభాలు, చెట్లు కూలే ప్రమాదం ఉన్నందున ప్రజలు ఇళ్లకే పరిమితం కావాలని కోరారు. తీరప్రాంత, లోతట్టు ప్రాంతాల నివాసితులు అధికారుల ఆదేశాల మేరకు పునరావాస కేంద్రాల్లోనే సురక్షితంగా ఉండాలని స్పష్టమైన హెచ్చరికలు జారీ చేశారు.
