Akash Agarwal: ఉత్తర్ ప్రదేశ్ శాసన మండలి ఎన్నికల వేళ ఆ రాష్ట్ర రాజకీయంలో తీవ్ర సంచలనాత్మక పరిణామం చోటుచేసుకుంది. సమాజ్‌వాదీ పార్టీ (ఎస్పీ)కి చెందిన ఆగ్రా బ్లాక్ టీచర్స్ ఎమ్మెల్సీ నియోజకవర్గ అభ్యర్థి ఆకాష్ అగర్వాల్ అధికారుల తీరుపై తీవ్ర ఆగ్రహం వ్యక్తం చేస్తూ ఇస్లాం మతంలోకి మారుతానని ప్రకటించారు. ఎన్నికల్లో పోటీ చేయడం కంటే తన కుటుంబం, మద్దతుదారుల ప్రాణ రక్షణే అత్యంత ముఖ్యమని ఆవేదన వ్యక్తం చేసిన ఆయన, వచ్చే నెల లక్నోలోని షాహీ ఈద్గాలో అధికారికంగా మతం మారుతున్నట్లు స్పష్టం చేశారు.
బూత్ క్యాప్చరింగ్, అధికారుల వేధింపులు.. కన్నీరు పెట్టుకున్న ఆకాష్ అగర్వాల్:
మీడియా సమావేశంలో మాట్లాడిన ఆకాష్ అగర్వాల్(Akash Agarwal), ఎన్నికల ప్రక్రియలో తీవ్రస్థాయిలో అక్రమాలు జరుగుతున్నాయని, అధికార బీజేపీ ఒత్తిడితో అధికారులు బూత్ క్యాప్చరింగ్‌కు పాల్పడుతున్నారని సంచలన ఆరోపణలు చేశారు. తన మేనేజర్లు, మద్దతుదారులను పోలీసులు చట్టవిరుద్ధంగా అరెస్ట్ చేస్తున్నారని, అధికారులు తమను పాకిస్తాన్ ఉగ్రవాదుల్లా చూస్తున్నారంటూ మీడియా ముందే కన్నీటిపర్యంతమయ్యారు. ఒక అధికారి తనను “నువ్వు ఎమ్మెల్సీ అభ్యర్థివి మాత్రమే, దేవుడివి కాదు” అని అవమానించడంతోనే తన దేవుడిని మార్చుకోవాలని నిర్ణయించుకున్నట్లు చెప్పారు.
యూపీ ఎమ్మెల్సీ పోలింగ్ వేళ వేడెక్కిన రాజకీయం.. తప్పుడు కేసుల భయం:
తనపై డ్రగ్స్, అక్రమ ఆయుధాల కేసులను బనావటీగా బనాయించే అవకాశం ఉందని ఆయన తీవ్ర ఆందోళన వ్యక్తం చేశారు. కాగా ఉత్తర్ ప్రదేశ్‌లోని 5 పట్టభద్రులు, 6 ఉపాధ్యాయ స్థానాలతో కలిపి మొత్తం 11 శాసన మండలి స్థానాలకు అక్టోబర్ 23న పోలింగ్ జరుగుతున్న సమయంలో ఈ ఘటన కలకలం రేపింది. లక్నో, వారణాసి, ఆగ్రా, మీరట్ వంటి ప్రధాన నియోజకవర్గాల్లో పోలింగ్ సాగుతుండగా ఎస్పీ అభ్యర్థి చేసిన ఈ వ్యాఖ్యలు రాష్ట్రవ్యాప్తంగా చర్చనీయాంశంగా మారాయి.
