Srikakulam Tragedy: దసరా పండుగ వేళ శ్రీకాకుళం జిల్లాలో తీవ్ర విషాదకర ఘటన చోటుచేసుకుంది. భవిష్యత్తుపై ఎన్నో ఆశలతో మార్కెటింగ్ శిక్షణ పొందుతున్న యువత, దసరా సెలవు రోజున సరదాగా గడిపేందుకు సముద్ర తీరానికి వెళ్లిన చోట మృత్యువు కబళించింది. నిషేధిత సముద్ర సంగమ ప్రాంతంలో సెల్ఫీలు దిగుతూ ప్రమాదవశాత్తు ఊబిలో కూరుకుపోయి అలల ఉద్ధృతికి కొట్టుకుపోవడంతో ముగ్గురు యువతులు, వారిని కాపాడేందుకు యత్నించిన ఒక యువకుడు ప్రాణాలు కోల్పోవడంతో వారి కుటుంబాల్లో తీవ్ర శోకసంద్రం నిండింది.
Heavy Rain Alert: తెలుగు రాష్ట్రాలకు అలర్ట్.. రానున్న 3 రోజులు వర్షాలు.. వాతావరణ శాఖ కీలక సూచన!
నిషేధిత సంగమ ప్రాంతంలో ఊబి ప్రమాదం.. కాపాడబోయిన యువకుడితో సహా నలుగురు మృతి:
శ్రీకాకుళం(Srikakulam Tragedy) రూరల్ మండలం పెద్దగనగళ్లవానిపేట వద్ద నాగావళి నది సముద్రంలో కలిసే సంగమ స్థలం ప్రమాదకరమైన ఊబితో కూడి ఉండటంతో పోలీసులు అక్కడ ముందస్తుగా హెచ్చరిక బోర్డులు ఏర్పాటు చేశారు. అయినప్పటికీ, విజయనగరం జిల్లాకు చెందిన కొండల మాధవి (19), గొల్లపల్లి పావని (19), పార్వతీపురం మన్యం జిల్లాకు చెందిన మర్రి మహి (18) ఆ ప్రాంతంలో సెల్ఫీలు దిగుతూ ఊబిలో చిక్కుకుపోగా, హఠాత్తుగా వచ్చిన రాకాసి అలలు వారిని లాక్కెళ్లాయి. నీటిలో మునిగిపోతున్న యువతులను రక్షించేందుకు విక్రమ్ (22) అనే యువకుడు సాహసంతో సముద్రంలోకి దిగినప్పటికీ, అలల తీవ్రతకు అతడు కూడా నీట మునిగి ప్రాణాలు కోల్పోయాడు.
సుదీర్ఘ గాలింపుతో బయటపడిన మృతదేహాలు.. కన్నీరుమున్నీరవుతున్న కుటుంబ సభ్యులు:
సమాచారం అందుకున్న అగ్నిమాపక, రెస్క్యూ సిబ్బంది వెంటనే రంగంలోకి దిగి గాలింపు చర్యలు చేపట్టగా, మంగళవారం సాయంత్రానికి మహి, పావనిల మృతదేహాలు లభ్యమయ్యాయి. ఇక నీటిలో గల్లంతైన విక్రమ్, మాధవిల మృతదేహాలు బుధవారం నాటికి కుందువానిపేట తీరానికి కొట్టుకువచ్చాయి. శ్రీకాకుళం సర్వజనాసుపత్రిలో పోస్టుమార్టం పూర్తి చేసిన అనంతరం మృతదేహాలను అశ్రునయనాల మధ్య కుటుంబ సభ్యులకు అప్పగించగా, పండుగ పూట అందంగా కలసిమెలసి ఉండాల్సిన పిల్లలు శవాలుగా మారడంతో స్వగ్రామాల్లో విషాద ఛాయలు అలుముకున్నాయి.
