రేటింగ్: 1.75/5
విడుదల తేదీ: నవంబర్ 19, 2026
నటీనటులు: విశ్వక్ సేన్, మాగంటి శ్రీనాథ్, అభినవ్ గోమఠం, వెంకటేష్ కాకుమాను, శివాత్మిక రాజశేఖర్ తదితరులు.
దర్శకత్వం:తరుణ్ భాస్కర్
నిర్మాతలు:సృజన్ యరబోలు, సందీప్ నాగిరెడ్డి
సంగీతం: వివేక్ సాగర్
ఛాయాగ్రహణం: ఏజే ఆరోన్
కూర్పు:రవితేజ గిరిజాల
పరిచయం:
తెలుగు ప్రేక్షకులకు ప్రత్యేకమైన కామెడీ, సహజమైన సంభాషణలు, స్నేహితుల మధ్య జరిగే సరదా సంఘటనలతో గుర్తుండిపోయిన చిత్రం ‘ఈ నగరానికి ఏమైంది?’. దర్శకుడు తరుణ్ భాస్కర్ తెరకెక్కించిన ఈ సినిమా యువతలో మంచి క్రేజ్ సంపాదించుకుంది. ముఖ్యంగా నలుగురు స్నేహితుల మధ్య కెమిస్ట్రీ, వారి జీవితాల్లో ఎదురయ్యే పరిస్థితులు ప్రేక్షకులను ఎంతగానో ఆకట్టుకున్నాయి.
ఇప్పుడు అదే స్నేహితుల బృందంతో ‘ఈ నగరానికి ఏమైంది? రిపీట్’ అంటూ మరోసారి ప్రేక్షకుల ముందుకు వచ్చారు తరుణ్ భాస్కర్. మొదటి భాగంపై ఉన్న అంచనాలు, అభిమానుల ఆసక్తి ఈ సినిమాపై కూడా భారీగానే ఉన్నాయి. అయితే సీక్వెల్ కావడంతో పాత మ్యాజిక్ను మరోసారి రిపీట్ చేయగలరా? కొత్త కథతో ప్రేక్షకులను నవ్వించగలరా? అనే ఆసక్తి నెలకొంది. మంచి బజ్ నడుమ ప్రీమియర్ల ద్వారా ప్రేక్షకుల ముందుకు వచ్చిన ఈ చిత్రం ఎలా ఉంది? అసలు కథేంటి? నటీనటుల పెర్ఫార్మెన్స్ ఎలా ఉంది? అనేది రివ్యూలో చూద్దాం.
కథ:
వివేక్ (విశ్వక్ సేన్), కార్తీక్ (మాగంటి శ్రీనాథ్), కౌశిక్ (అభినవ్ గోమఠం), ఉపేంద్ర (వెంకటేష్ కాకుమాను)లు మంచి స్నేహితులు. సినిమాలపై ఆసక్తితో తమ కలలను నిజం చేసుకోవాలనే లక్ష్యంతో ప్రయాణం మొదలుపెట్టిన ఈ నలుగురికి మొదటి సినిమా పరాజయం పెద్ద ఎదురుదెబ్బగా మారుతుంది. ఆ సినిమా ఫ్లాప్ కావడంతో అప్పులు, ఆర్థిక ఇబ్బందులు, వ్యక్తిగత సమస్యలు ఎదురవుతాయి. దీంతో నలుగురూ ఎవరికి వారు వేర్వేరు దారుల్లో తమ జీవిత ప్రయాణాన్ని కొనసాగిస్తారు.
వివేక్ మాత్రం సినిమా కోసం చేసిన అప్పులను తీర్చే బాధ్యతను తీసుకుని వెడ్డింగ్ మేనేజ్మెంట్ కంపెనీలో పనిచేస్తుంటాడు. మరోవైపు కౌశిక్ నటుడిగా తన కెరీర్ను కొనసాగిస్తాడు. ఉపేంద్ర ఎడిటర్గా పనిచేస్తుండగా, కార్తీక్ సినిమాటోగ్రాఫర్గా స్థిరపడే ప్రయత్నం చేస్తుంటాడు.
ఈ క్రమంలో కొన్ని అనూహ్య పరిణామాలు చోటుచేసుకుంటాయి. ఉపేంద్ర కజిన్ కీర్తన (శివాత్మిక రాజశేఖర్)తో కార్తీక్ ప్రేమలో పడతాడు. అయితే కీర్తనకు అప్పటికే మరో వ్యక్తితో పెళ్లి నిశ్చయమై ఉంటుంది. దీంతో కార్తీక్ ప్రేమ కథ కొత్త మలుపు తిరుగుతుంది.
కీర్తనను తన జీవితంలోకి తీసుకురావడానికి కార్తీక్ ఏం చేశాడు? అతని ప్రేమకు అడ్డుగా నిలిచిన పరిస్థితులు ఏంటి? ఈ సమస్యలో మిగిలిన ముగ్గురు స్నేహితులు ఎలా భాగమయ్యారు? స్నేహితుడి ప్రేమ కోసం వాళ్లు ఎలాంటి సాహసానికి సిద్ధమయ్యారు? చివరకు తమ స్నేహాన్ని, తమ జీవితాలను ఎలా నిలబెట్టుకున్నారు? అనేదే మిగిలిన కథ.
కథనం, విశ్లేషణ:
మొదటి భాగంలో నలుగురు స్నేహితుల మధ్య ఉండే సహజమైన స్నేహం, వారి కలలు, జీవితంలో ఏదో సాధించాలనే తపన, మధ్యలో ఎదురయ్యే సరదా సంఘటనలు ప్రధాన ఆకర్షణగా నిలిచాయి. ఈసారి కూడా దర్శకుడు అదే స్నేహితుల బృందాన్ని తీసుకుని మరో కథను చెప్పే ప్రయత్నం చేశారు.
సినిమా ప్రారంభంలోనే పాత్రలను పరిచయం చేస్తూ వారి ప్రస్తుత జీవిత పరిస్థితులను చూపించారు. మొదటి సినిమా ఫ్లాప్ తర్వాత ఒక్కొక్కరు ఒక్కో రంగంలో స్థిరపడటం, వారి మధ్య ఉన్న అనుబంధం, వ్యక్తిగత జీవితాల్లో ఎదురవుతున్న సమస్యలను పరిచయం చేశారు. ఈ ఎపిసోడ్స్లో కొన్ని చోట్ల నవ్వులు పూస్తాయి.
కార్తీక్ ప్రేమకథతో కథలో ప్రధాన సంఘర్షణ మొదలవుతుంది. కీర్తనకు పెళ్లి నిశ్చయం కావడం, కార్తీక్ ఆమెను ప్రేమించడం, ఈ విషయం తెలిసిన తర్వాత స్నేహితులు అతనికి అండగా నిలబడటం వంటి అంశాలతో కథ ముందుకు సాగుతుంది. స్నేహం, ప్రేమ, బాధ్యతల మధ్య నడిచే ఈ కథలో కామెడీకి మంచి అవకాశం ఉన్నప్పటికీ, దాన్ని పూర్తిస్థాయిలో ఉపయోగించుకోవడంలో దర్శకుడు కొంత తడబడ్డారు.
ముఖ్యంగా కొన్ని సన్నివేశాలు గతంలో చూసిన తరహాలోనే అనిపిస్తాయి. మొదటి భాగంలో ఉన్న సహజత్వం, అనుకోకుండా పుట్టే హాస్యం, పాత్రల మధ్య ఉండే ప్రత్యేకమైన కెమిస్ట్రీ ఈసారి అంత బలంగా కనిపించవు. కొన్ని కామెడీ సన్నివేశాలు నవ్వించినా, మరికొన్ని సన్నివేశాలు సాగదీసినట్టుగా అనిపిస్తాయి.
కథలో ప్రధానమైన ప్రేమ సంఘర్షణకు మరింత బలమైన భావోద్వేగాలను జోడించి ఉంటే సినిమా స్థాయి పెరిగేది. ముఖ్యంగా నలుగురు స్నేహితులు కలిసి తీసుకునే నిర్ణయాలు, వారి మధ్య ఉండే అనుబంధం ప్రేక్షకులకు మరింత కనెక్ట్ అయ్యేలా రాసుకుని ఉంటే బాగుండేది.
నటీనటుల పెర్ఫార్మెన్స్:
విశ్వక్ సేన్ తనదైన శైలిలో నటించారు. అయితే ఆయన పాత్రకు కథలో మరింత ప్రాధాన్యత ఇచ్చి ఉంటే బాగుండేది. మొదటి భాగంతో పోలిస్తే ఈ సినిమాలో వివేక్ పాత్రను సమర్థవంతంగా ఉపయోగించుకోలేకపోయారనే భావన కలుగుతుంది.
కార్తీక్ పాత్రలో మాగంటి శ్రీనాథ్ తన పరిధి మేరకు బాగానే నటించారు. అయితే మొదటి భాగంలో ఈ పాత్రలో కనిపించిన సాయి సుశాంత్ రెడ్డితో ప్రేక్షకులకు ఇప్పటికే అనుబంధం ఏర్పడింది. దీంతో కొత్త నటుడిని ఆ పాత్రలో అంగీకరించడానికి కొంత సమయం పడుతుంది. పాత్ర మార్పు కొన్ని సందర్భాల్లో సహజత్వానికి దూరంగా అనిపిస్తుంది.
కౌశిక్ పాత్రలో అభినవ్ గోమఠం తన కామెడీ టైమింగ్తో ఆకట్టుకునే ప్రయత్నం చేశారు. ఆయన నుంచి ఆశించే హాస్యం కొన్ని సన్నివేశాల్లో బాగానే వర్కౌట్ అయింది. ఉపేంద్ర పాత్రలో వెంకటేష్ కాకుమాను కూడా తనదైన శైలిలో నటించారు. శివాత్మిక రాజశేఖర్ తన పాత్రకు న్యాయం చేశారు.
అయితే ప్రధాన పాత్రలన్నింటికీ సమానమైన ప్రాధాన్యత ఇచ్చి, వాటి మధ్య మరింత బలమైన సన్నివేశాలు రాసుకుని ఉంటే నటీనటుల ప్రతిభ మరింతగా బయటపడేది.
సాంకేతిక విభాగం:
వివేక్ సాగర్ సంగీతం సినిమా మూడ్కు అనుగుణంగా ఉంది. నేపథ్య సంగీతం కొన్ని సన్నివేశాలకు బలాన్ని ఇచ్చింది. అయితే మొదటి భాగంలో సంగీతం, పాటలు ప్రేక్షకుల్లో సృష్టించిన ప్రభావంతో పోలిస్తే ఈసారి అంతగా గుర్తుండిపోయే స్థాయిలో లేవు.
ఏజే ఆరోన్ ఛాయాగ్రహణం బాగుంది. సన్నివేశాలను సహజంగా చూపించే ప్రయత్నం చేశారు. రవితేజ గిరిజాల ఎడిటింగ్ విషయంలో మరింత శ్రద్ధ పెట్టాల్సింది. ముఖ్యంగా సాగదీసిన సన్నివేశాలను తగ్గించి ఉంటే సినిమా వేగం మెరుగుపడేది.
దర్శకుడు తరుణ్ భాస్కర్ విషయానికి వస్తే, ఆయన నుంచి ప్రేక్షకులు ఆశించే ప్రత్యేకమైన హాస్యం, సహజమైన సంభాషణలు, స్నేహితుల మధ్య ఉండే ఆత్మీయత ఈ సినిమాలో పూర్తిస్థాయిలో కనిపించలేదు. కథలో మంచి అవకాశం ఉన్నప్పటికీ, స్క్రీన్ప్లేలో కొత్తదనం లోపించింది.
ప్లస్ పాయింట్స్:
– నలుగురు స్నేహితుల మధ్య కొన్ని సరదా సన్నివేశాలు
– అభినవ్ గోమఠం కామెడీ టైమింగ్
– కొన్ని చోట్ల సహజమైన సంభాషణలు
– వివేక్ సాగర్ నేపథ్య సంగీతం
– ఏజే ఆరోన్ ఛాయాగ్రహణం
మైనస్ పాయింట్స్:
– కథలో కొత్తదనం కొరవడటం
– మొదటి భాగం స్థాయి వినోదం లేకపోవడం
– కొన్ని సన్నివేశాలు రొటీన్గా అనిపించడం
– వివేక్ పాత్రకు సరైన ప్రాధాన్యత లేకపోవడం
– కార్తీక్ పాత్రలో నటుడి మార్పు వల్ల ఏర్పడిన అసహజత్వం
– కథనం కొన్ని చోట్ల నెమ్మదించడం
– బలహీనమైన క్లైమాక్స్
– భావోద్వేగాల పరంగా ప్రేక్షకులను పూర్తిగా కనెక్ట్ చేయలేకపోవడం
చివరిగా:
‘ఈ నగరానికి ఏమైంది? రిపీట్’లో నలుగురు స్నేహితుల స్నేహం, ప్రేమ, జీవితంలో ఎదురయ్యే సమస్యలు, వాటిని అధిగమించేందుకు చేసే ప్రయత్నాలు వంటి అంశాలను చూపించే ప్రయత్నం చేశారు తరుణ్ భాస్కర్. కొన్ని కామెడీ సన్నివేశాలు నవ్వించినా, కథనం మాత్రం పూర్తిస్థాయిలో ఆకట్టుకోలేకపోయింది. ముఖ్యంగా మొదటి భాగంతో పోలిస్తే కొత్తదనం, బలమైన హాస్యం, భావోద్వేగాలు తగ్గాయి.
అన్నింటికంటే క్లైమాక్స్ ఈ సినిమాకు పెద్ద మైనస్గా నిలుస్తుంది. ప్రధాన సంఘర్షణను మరింత ఆసక్తికరంగా, సంతృప్తికరంగా ముగించి ఉంటే ఫలితం మరోలా ఉండేది. చివరకు ప్రేక్షకులకు బలమైన అనుభూతిని ఇవ్వకుండానే సినిమా ముగుస్తుంది.
మొత్తంగా చెప్పాలంటే.. మొదటి భాగంపై ఉన్న అంచనాలను అందుకోవడంలో ‘ఈ నగరానికి ఏమైంది? రిపీట్’ విఫలమైంది. స్నేహితుల మధ్య సరదా సన్నివేశాల కోసం ఒకసారి చూడాలనుకునే వారికి కొన్ని క్షణాలు నచ్చవచ్చు.

