Rajendranagar Accident: హైదరాబాద్ శివార్లలోని రాజేంద్రనగర్‌ పరిధి టీజీ పోలీసు అకాడమీ సమీపంలో చోటుచేసుకున్న తీవ్ర రోడ్డు ప్రమాదం స్థానికంగా తీవ్ర విషాదాన్ని నింపింది. ఔటర్ రింగ్ రోడ్డు (ORR) నుంచి బయటకు వస్తున్న లారీని వెనుక నుంచి వేగంగా వచ్చిన ఆటో ఢీకొట్టడంతో ఈ ప్రమాదం జరిగింది. ప్రమాద సమయంలో ఆటోలో మొత్తం 17 మంది కార్మికులు ప్రయాణిస్తుండగా, ఘటన తీవ్రతకు ముగ్గురు కార్మికులు అక్కడికక్కడే ప్రాణాలు కోల్పోగా, మరో ఇద్దరికి తీవ్ర గాయాలయ్యాయి.
ముచ్చింతల్ నుంచి వస్తుండగా విషాదం.. ఘటనాస్థలికి చేరుకున్న పోలీసులు:
ముచ్చింతల్‌లో చెట్లు నాటే పనులు ముగించుకుని ఆటోలో శంషాబాద్‌ నుంచి మొయినాబాద్‌(Rajendranagar Accident) వెళ్తుండగా ఈ దుర్ఘటన చోటుచేసుకుంది. ఈ ప్రమాదంలో మృతి చెందిన వారిని సురేశ్‌, పెంటయ్య, లింగరాజుశెట్టిగా పోలీసులు ప్రాథమికంగా గుర్తించారు. సమాచారం అందుకున్న వెంటనే పోలీసులు ఘటనాస్థలానికి చేరుకుని, గాయపడిన వారిని ఆసుపత్రికి తరలించారు. ఈ ఘటనపై కేసు నమోదు చేసి తదుపరి విచారణ జరుపుతున్నారు.
