Ap Heavy Rains: మురసు తీవ్ర తుఫాను తీరం దాటి బలహీనపడినప్పటికీ, దాని ప్రభావంతో ఆంధ్రప్రదేశ్ వ్యాప్తంగా వర్షభీభత్సం కొనసాగుతోంది. తుఫాను శేష ప్రభావం ఉపరితల ఆవర్తనంగా మారడంతో తీరప్రాంతం నుంచి ఉత్తరాంధ్ర వరకు అనేక ప్రాంతాల్లో ఎడతెరిపి లేని వర్షాలు కురుస్తున్నాయి. ముఖ్యంగా ప్రకాశం, బాపట్ల, నెల్లూరు, కృష్ణా, ఎన్టీఆర్, కాకినాడ, పశ్చిమ, తూర్పు గోదావరి జిల్లాల్లో భారీ నుంచి అత్యంత భారీ వర్షాలు(Ap Heavy Rains) నమోదయ్యాయి. లోతట్టు ప్రాంతాలు నీటమునిగి జలమయమవ్వడంతో పాటు పలుచోట్ల వాగులు, వంకలు ఉప్పొంగి ప్రవహిస్తుండటంతో రవాణా వ్యవస్థకు తీవ్ర విఘాతం కలిగింది.
అప్రమత్తమైన యంత్రాంగం.. రంగంలోకి ఎన్డీఆర్‌ఎఫ్, పర్యవేక్షణలో కలెక్టర్లు:
తీవ్ర వర్షాల నేపథ్యంలో ఎన్డీఆర్‌ఎఫ్ (NDRF), ఎస్‌డీఆర్‌ఎఫ్ (SDRF) బృందాలను ప్రభావిత జిల్లాల్లో రంగంలోకి దించిన ప్రభుత్వం, లోతట్టు ప్రాంత ప్రజలను సురక్షిత ప్రాంతాలకు తరలించి పునరావాస కేంద్రాలను ఏర్పాటు చేసింది. కంట్రోల్ రూమ్‌లను 24 గంటలూ అందుబాటులో ఉంచి పరిస్థితులను జిల్లా కలెక్టర్లు, అధికారులు నిరంతరం పర్యవేక్షిస్తున్నారు. అత్యవసర పరిస్థితి ఉంటే తప్ప ప్రజలు బయటకు రాకూడదని విపత్తు నిర్వహణ సంస్థ హెచ్చరించింది.
జలాశయాలకు వరద ఉధృతి.. నదీ పరివాహక ప్రాంతాల ప్రజలకు హెచ్చరికలు:
ఎగువ ప్రాంతాల్లో కురుస్తున్న వర్షాల కారణంగా నాగార్జునసాగర్, పులిచింతల సహా ప్రధాన ప్రాజెక్టులు, రిజర్వాయర్లకు వరద నీరు పోటెత్తుతోంది. దీంతో కృష్ణా, గోదావరి నదీ పరివాహక ప్రాంతాలు, లోతట్టు ప్రాంత ప్రజలను అధికారులు తీవ్రంగా అప్రమత్తం చేశారు. నీటిముంపు ప్రమాదం ఉన్న ప్రాంతాల్లో సహాయక చర్యలు ముమ్మరం చేయడంతో పాటు, వాగులు దాటే ప్రయత్నాలు చేయవద్దని హెచ్చరికలు జారీ చేశారు.
