DA Hike: దీపావళి పండుగ వేళ కేంద్ర ప్రభుత్వ ఉద్యోగులు, పింఛనుదారులు ఎంతగానో నిరీక్షిస్తున్న కరువు భత్యం (DA Hike) పెంపుపై తుది నిర్ణయం వెలువడే ఘడియలు దగ్గరపడ్డాయి. అక్టోబర్ 28న ప్రధాని నరేంద్ర మోదీ అధ్యక్షతన జరగనున్న కేంద్ర మంత్రివర్గ సమావేశంలో ఈ ప్రతిపాదనకు ఆమోద ముద్ర వేసే అవకాశముందని సంబంధిత వర్గాలు వెల్లడించాయి. ప్రస్తుతం ఉద్యోగులకు 60 శాతంగా అందుతున్న డీఏను మరో 3 శాతం పెంచి 63 శాతానికి తీసుకెళ్లేందుకు పౌరసరఫరాల, ఆర్థిక శాఖల సమీకరణాలు పూర్తయ్యాయి. పండుగ బోనస్‌లు ఇప్పటికే ప్రకటించినప్పటికీ, ఈ డీఏ ప్రతిపాదన ఓకే అయితే దేశవ్యాప్తంగా దాదాపు 50 లక్షల మంది ఉద్యోగులు, 65 లక్షల మంది విశ్రాంత ఉద్యోగుల కుటుంబాల్లో కొత్త వెలుగులు నిండనున్నాయి.
Cyclone Arnab: వేగంగా దూసుకొస్తున్న ‘అర్నబ్’తుఫాన్.. ఏపీలో మొదలైన ముసురు.. కోస్తాంధ్రకు రెడ్ అలర్ట్!
జూలై 2026 నుంచే అమలు.. నవంబర్ జీతంతో నాలుగు నెలల బకాయిల జమ:
జూలై 2025 నుంచి జూన్ 2026 వరకు నమోదు నమోదైన సగటు వినియోగదారుల ధరల సూచీ (CPI-IW) గణాంకాల ఆధారంగా ఈ 3 శాతం పెంపును సిఫారసు చేశారు. కేబినెట్ గ్రీన్ సిగ్నల్ ఇవ్వగానే ఈ పెంపుదల జూలై 1, 2026 నుంచే ముందస్తు తేదీతో అమల్లోకి వస్తుంది. దీనివల్ల ఉద్యోగులకు జూలై, ఆగస్టు, సెప్టెంబర్, అక్టోబర్ నెలలకు సంబంధించి నాలుగు నెలల డీఏ బకాయిలు చేకూరనున్నాయి. ఈ బకాయిల మొత్తాన్ని నవంబర్ నెలాఖరున చెల్లించే సాధారణ వేతనంతో కలిపి ఒకేసారి డిపాజిట్ చేయడానికి కేంద్ర ఆర్థిక శాఖ సర్క్యులర్ సిద్ధం చేస్తున్నట్లు సమాచారం.
జీతాల్లో చెప్పుకోదగ్గ పెరుగుదల.. బేసిక్ పే ఆధారంగా వేతన లెక్కింపు:
ప్రతి ఉద్యోగి ప్రాథమిక వేతనం ప్రాతిపదికగా డీఏ మార్పులు వర్తిస్తాయి. డీఏతో పాటు ప్రధాన నగరాల్లో పనిచేసే వారి రవాణా అలవెన్స్ కూడా పెరగనుంది. ఉదాహరణకు, రూ. 47,600 బేసిక్ పే కలిగి ఉన్న లెవెల్-8 ఉద్యోగికి 3 శాతం డీఏ పెంపు ద్వారా ప్రతి నెలా రూ. 1,428 అదనపు లబ్ధి కలుగుతుంది. దీనికి తోడు రవాణా అలవెన్స్‌లో మరో రూ. 108 వరకు పెరుగుదల నమోదై, మొత్తంగా నెలకు జీతంలో చెప్పుకోదగ్గ మార్పు కనిపిస్తుంది. పండుగల సీజన్‌లో ప్రభుత్వం అందిస్తున్న ఈ ఊరటతో ఉద్యోగ వర్గాల్లో ఆనందోత్సాహాలు వ్యక్తమవుతున్నాయి.
