YS Jagan: ఆంధ్రప్రదేశ్ రాజకీయంలో వైఎస్ కుటుంబ వివాహ వేదిక అంశం తీవ్ర చర్చనీయాంశంగా మారింది. కాంగ్రెస్ అధ్యక్షురాలు వైఎస్ షర్మిల కుమార్తె అంజిలి వివాహాన్ని జగన్ అడ్డుకున్నారని, ఆయన ఒక ‘కంసమామ’గా ప్రవర్తించారని సీఎం చంద్రబాబు నాయుడు చేసిన ఆరోపణలను వైకాపా వర్గాలు తీవ్రంగా ఖండించాయి. టీడీపీ అనుకూల మీడియాలో వాస్తవాలను తప్పుదోవ పట్టిస్తూ కథనాలు ప్రసారం చేస్తుండటంతో, గత అక్టోబర్ 9వ తేదీన వైఎస్ షర్మిలకు వైఎస్ జగన్ రాసిన అసలు లేఖను వైకాపా బయటపెట్టింది. రాజకీయాన్ని, కుటుంబ భద్రతాంశాలను ముడిపెట్టి అసత్య ప్రచారాలు చేయడంపై వైకాపా నేతలు ఆగ్రహం వ్యక్తం చేశారు.
బెంగళూరు నివాసంలో భద్రతా ముప్పు.. లేఖలో స్పష్టం చేసిన వైఎస్ జగన్:
షర్మిలకు రాసిన లేఖలో వైఎస్ జగన్ మోహన్ రెడ్డి (YS Jagan)తన అభ్యంతరాలను, సెక్యూరిటీ ఆందోళనలను అత్యంత వివరంగా పేర్కొన్నారు. బెంగళూరులోని తన సొంత నివాసంలో పెళ్లి జరిపితే క్యాటరింగ్, ఫొటోగ్రఫీ, ఈవెంట్ మేనేజ్‌మెంట్ సిబ్బంది, అపరిచిత వ్యక్తులు భారీగా రాకపోకలు సాగిస్తారని తెలిపారు. దీనివల్ల నివాస ప్రాంగణానికి సంబంధించిన దృశ్యాలు ప్రచారంలోకి వచ్చి తీవ్ర భద్రతాపరమైన, వ్యక్తిగత గోప్యతా సమస్యలు తలెత్తుతాయని వివరించారు. హర్ష లేదా వర్ష పెళ్లి విషయంలోనైనా తాను ఇదే సూత్రానికి కట్టుబడి ఉండేవాడినని, కుటుంబ భద్రత దృష్ట్యానే ఈ నిర్ణయం తీసుకున్నానని జగన్ స్పష్టం చేశారు.
లోటస్ పాండ్ ఇల్లు లేదా ఆల్టర్నేటివ్ వెన్యూ ఆఫర్.. సున్నితంగా తిరస్కరించిన వైకాపా అధినేత:
జిలీ (అంజిలి) చిన్నప్పటి నుండి తన కళ్ల ముందే పెరిగిందని, ఆమె పెళ్లి జీవితాంతం గుర్తుండిపోయేలా సంతోషంగా జరగాలనేదే తన కోరిక అని జగన్ లేఖలో గుర్తుచేశారు. ఒకవేళ కన్వెన్షన్ సెంటర్ లేదా డెస్టినేషన్ వెడ్డింగ్ ఇష్టం లేకపోతే, హైదరాబాద్‌లోని తన ‘లోటస్ పాండ్’ ఆస్తిని వివాహ వేదికగా ఉచితంగా ఉపయోగించుకోవచ్చని తాను ముందే ఆఫర్ ఇచ్చానని, ఆ ప్రతిపాదన ఇప్పటికీ అమల్లోనే ఉందని స్పష్టం చేశారు. తన అభ్యంతరాలను పరిగణనలోకి తీసుకోకుండా బెంగళూరు ఇంటోనే పెళ్లి చేయాలని పట్టుబట్టడం బాధిస్తోందని ఆయన ఆవేదన వ్యక్తం చేశారు.
చంద్రబాబు వ్యాఖ్యలకు చెక్.. రాజకీయ లబ్ధి కోసమే దుష్ప్రచారం:
ముఖ్యమంత్రి చంద్రబాబు నాయుడు కేవలం రాజకీయ ప్రయోజనాల కోసమే కుటుంబ అంతర్గత విషయాలను, లేఖలోని అసలు సారాంశాన్ని దాచిపెట్టి అసత్య ప్రచారం చేస్తున్నారని వైకాపా నేతలు మండిపడ్డారు. వివాహాన్ని అడ్డుకోవడం జగన్ ఉద్దేశం కాదని, ప్రత్యామ్నాయంగా లోటస్ పాండ్ వేదికను కూడా ఇచ్చారని లేఖ ద్వారా స్పష్టమవుతోందని పేర్కొన్నారు. తమ అధినేతపై లేనిపోని నిందలు వేస్తూ ప్రజా సమస్యల నుంచి దృష్టి మళ్లించేందుకే టీడీపీ ఈ తరహా కల్పిత కథనాలను వాడుకుంటోందని వారు దుయ్యబట్టారు.
