Paritala Sriram: ఆంధ్రప్రదేశ్ స్థానిక సంస్థల ఎన్నికల వేళ శ్రీ సత్యసాయి జిల్లా రాజకీయాల్లో ఊహించని పరిణామం చోటుచేసుకుంది. తెలుగుదేశం పార్టీ (తెదేపా) యువ నాయకుడు, ధర్మవరం నియోజకవర్గ ఇన్ఛార్జ్ పరిటాల శ్రీరామ్ నల్లచెరువు స్థానం నుంచి జెడ్పీటీసీ అభ్యర్థిగా నామినేషన్ దాఖలు చేశారు. జిల్లా పరిషత్ (జెడ్పీ) ఛైర్మన్ పీఠాన్ని కైవసం చేసుకోవడమే లక్ష్యంగా తెదేపా అధిష్ఠానం వ్యూహాత్మకంగా పరిటాల శ్రీరామ్‌ను బరిలోకి దించినట్లు తెలుస్తోంది. భారీ సంఖ్యలో తరలివచ్చిన పార్టీ నాయకులు, కార్యకర్తల సమక్షంలో ఆయన తన నామినేషన్ పత్రాలను ఎన్నికల అధికారులకు సమర్పించారు.
జెడ్పీ పీఠమే లక్ష్యం.. ఉమ్మడి అనంతపురంలో ఊపందుకున్న ఎన్నికల ప్రచారం:
పరిటాల శ్రీరామ్(Paritala Sriram) జెడ్పీటీసీ బరిలో నిలవడంతో శ్రీ సత్యసాయి, అనంతపురం జిల్లాల్లో పొలిటికల్ హీట్ ఒక్కసారిగా పెరిగింది. నల్లచెరువు నుంచి జెడ్పీటీసీగా గెలిపించి, ఆపై జిల్లా పరిషత్ ఛైర్మన్ పీఠంపై కూర్చోబెట్టే దిశగా తెదేపా ప్రణాళికలు సిద్ధం చేసింది. పరిటాల కుటుంబానికి రాయలసీమలో ఉన్న బలమైన ప్రజాదరణ, క్యాడర్ మద్దతు ఈ ఎన్నికల్లో పార్టీ విజయావకాశాలను మరింత మెరుగుపరుస్తుందని తెదేపా శ్రేణులు ధీమా వ్యక్తం చేస్తున్నాయి. నామినేషన్ ప్రక్రియ పూర్తయిన వెంటనే శ్రీరామ్ క్షేత్రస్థాయిలో విస్తృత ప్రచారానికి శ్రీకారం చుట్టారు.
