Joe Root : చరిత్ర సృష్టించిన జో రూట్.. ఆ మార్క్ దాటిన తొలి బ్యాట‌ర్‌గా రికార్డు.. ఇంగ్లాండ్ క్రికెట్లో సరికొత్త అధ్యాయం!

Joe Root : పాకిస్థాన్ వేదికగా జరుగుతున్న వన్డే ట్రై – సిరీస్‌లో భాగంగా గురువారం ఇంగ్లాండ్, శ్రీలంక జట్ల మధ్య రావల్పిండి స్టేడియంలో మ్యాచ్ జరిగింది. ఈ మ్యాచ్ లో రికార్డుల మోత మోగింది. వన్డే చరిత్రలోనే రెండో అత్యధిక పరుగులు టార్గెట్ ను ఛేదించిన జట్టుగా శ్రీలంక రికార్డుకెక్కింది. ఇంగ్లాండ్ విధించిన 430 పరుగుల లక్ష్యాన్ని శ్రీలంక 49.5 ఓవర్లలో ఎనిమిది వికెట్లు కోల్పోయి అందుకుంది. అయితే, ఈ మ్యాచ్ లో ఇంగ్లాండ్ జట్టు ఓడిపోయినప్పటికీ.. ఆ జట్టు స్టార్ బ్యాటర్ జోరూట్ సరికొత్త రికార్డును నమోదు చేశాడు.

Also Read : England vs Sri Lanka ODI : ఇంగ్లాండ్‌కు భారీ షాకిచ్చిన శ్రీలంక.. వన్డే క్రికెట్‌లో అరుదైన రికార్డు.. అసాధ్యమనుకున్న టార్గెట్‌ను ఊదేశారు.!

ఇంగ్లాండ్ క్రికెట్ చరిత్రలో స్టార్ బ్యాటర్ జో రూట్ (Joe Root) అరుదైన ఘనత సాధించాడు. పాకిస్థాన్ వేదికగా జరుగుతున్న వన్డే ట్రై-సిరీస్‌లో భాగంగా శ్రీలంకతో జరిగిన మ్యాచ్‌లో రూట్ ఈ చారిత్రాత్మక మైలురాయిని అందుకున్నాడు. వన్డే అంతర్జాతీయ క్రికెట్‌లో 8,000 పరుగులు పూర్తి చేసుకున్న తొలి ఇంగ్లాండ్ ఆటగాడిగా రికార్డులకెక్కాడు.

శ్రీలంకతో జరిగిన మ్యాచ్‌లో జో రూట్ అద్భుతమైన బ్యాటింగ్‌తో ఆకట్టుకున్నాడు. కేవలం 66 బంతుల్లోనే 8 ఫోర్లతో 69 పరుగులు సాధించిన రూట్, ఈ ఇన్నింగ్స్‌ ద్వారానే వన్డేల్లో 8 వేల పరుగుల మార్క్‌ను దాటాడు. తన 186వ వన్డే ఇన్నింగ్స్‌లో ఈ రికార్డును నమోదు చేసి, 50 ఓవర్ల ఫార్మాట్‌లో తన నిలకడైన ప్రదర్శనను మరోసారి నిరూపించుకున్నాడు. ఈ తాజా ఇన్నింగ్స్‌తో కలిపి రూట్ తన వన్డే కెరీర్‌లో మొత్తం 197 మ్యాచ్‌లు ఆడి 50.66 సగటుతో, 87.83 స్ట్రైక్ రేట్‌తో 8,005 పరుగులు సాధించాడు. ఇందులో 20 సెంచరీలు, 49 అర్ధశతకాలు ఉన్నాయి. వన్డేల్లో ఆయన వ్యక్తిగత గరిష్ట స్కోరు 166 పరుగులుగా ఉంది.

ఇంగ్లాండ్ తరఫున వన్డేల్లో అత్యధిక పరుగులు సాధించిన ఆటగాళ్ల జాబితాలో జో రూట్ ప్రథమ స్థానంలో కొనసాగుతున్నాడు. ఆయన తర్వాత మాజీ కెప్టెన్ ఇయాన్ మోర్గాన్ 225 మ్యాచ్‌ల్లో 6,957 పరుగులతో రెండో స్థానంలో ఉండగా, జోస్ బట్లర్ (5,678 ప‌రుగులు), ఇయాన్ బెల్ (5,416 ప‌రుగులు), పాల్ కొలింగ్‌వుడ్ (5,092 ప‌రుగులు) తదితరులు ఆ తర్వాతి స్థానాల్లో ఉన్నారు. ఇంగ్లాండ్ తరఫున అత్యధిక సెంచరీలు, అత్యుత్తమ బ్యాటింగ్ యావరేజ్ కలిగిన ఆటగాడిగా కూడా రూట్ రికార్డు సృష్టించాడు.

2013లో రాజ్‌కోట్‌లో భారత్‌తో జరిగిన మ్యాచ్ ద్వారా వన్డేల్లో అరంగేట్రం చేసిన రూట్, దశాబ్ద కాలంగా ఇంగ్లాండ్ జట్టుకు నమ్మదగిన బ్యాటర్‌గా సేవలు అందిస్తూనే ఉన్నాడు. క్లిష్ట పరిస్థితుల్లోనూ ఇన్నింగ్స్‌ను నిలబెట్టగలగడం ఆయన ప్రత్యేకత. తాజాగా సాధించిన ఈ మైలురాయితో జో రూట్ ప్రపంచ క్రికెట్‌లో మరోసారి తన ప్రత్యేకతను చాటుకున్నాడు.